Nur-Sultan jedel járdem qyzmetine qońyraýlar sany eki ese azaıdy. Bul týraly qalalyq jedel járdem stansııasynyń dırektory Murat Orazbaev málimdedi.
"Búgingi tańda jedel járdemge júrgingender sany 2200-di quraıdy, karantınge deıin 4000-ǵa jýyq ótinish túsken. Sonymen qatar qońyraýlardyń azaıǵany baıqalady. Qazir kúnine 1400-ge jýyq qońyraý túsedi, buǵan deıin olardyń sany 3 myńǵa jýyq bolǵan. Olardyń ishinde koronavırýs ınfeksııasyna baılanysty 500 qońyraý bolatyn, búgin tańerteń – 182. Iаǵnı, bári eki ese azaıdy", – deıdi M.Orazbaev.
Jedel járdem dırektorynyń aıtýynsha, eń kóp júkteme maýsymnyń sońynda tirkeldi. Jaǵdaıdy retteýde qabyldanǵan sharalar – karantın engizý, ahýaldyq ortalyq qurý, naýqastarǵa telefon arqyly keńes berý mańyzdy ról atqardy. Degenmen, dárigerlerdiń aıtýynsha, bosańsýǵa áli erte.
"Alda kúz, JRVI maýsymy. KVI qaıta órshýi de múmkin. Biz buǵan daıyn bolýymyz kerek. Epıdemıologııalyq ahýaldyń nasharlaýy múmkin ekenin eskerip, biz adamdarymyzdy, tehnıkalarymyzdy daıyndaýdamyz. Avtokólik parkin keńeıtýdemiz. Sondaı-aq, tamyz aıynda 14 reanımobıl keledi dep kútilýde. Medısına kolledjderi túlekteriniń arasynan qyzmetkerlerdi qosymsha irikteý, olardy oqytý jáne daıyndaý júzege asyrylýda", – dep túsindirdi elordalyq jedel járdem dırektory.
Esterińizge sala keteıik, habarlanǵandaı, Nur-Sultan emdeý mekemelerinde 360 jas maman jumys isteı bastaıdy. Ár medısına uıymynda jastarǵa keńes beretin aǵa maman bar.
