Máselen, jergilikti kásipker Mahmýt Meralıev densaýlyq saqtaý mekemelerine dári-dármek alyp berý úshin qarjy jınaýǵa bastama kóterdi. Soǵan baılanysty «Atameken» UKP Atyraý óńirlik fılıaly janynan kásipkerler, oblystyq ákimdik pen densaýlyq saqtaý basqarmasynyń, qoǵamdyq uıymdardyń ókilderinen jumysshy toby quryldy. Al, oblystyq densaýlyq saqtaý basqarmasy qajetti dári-dármektiń tizimin usyndy. Jumysshy toby jetekshileriniń biri – «Ideal Market» JShS-niń bas dırektory Talǵat Bekenovtiń aıtýynsha, alǵashqy eki kúnde «Sana» qaıyrymdylyq qoryna 30 mln teńge jınaldy.
– Qordyń esepshotyna túsken qarjynyń bir bóligi oblystyq aýrýhana suratqan eń qajetti dári-dármekter jıyntyǵyn satyp alýǵa jumsaldy. Biz №2 oblystyq ınfeksııalyq aýrýhana janyndaǵy provızorlyq stasıonarǵa 10 túrli medısınalyq dári-dármektiń 3245 danasyn tapsyrdyq. Onyń ishinde deksametazon, sıanokobalamın, pırıdoksın, seftrıakson, azıtromısın, ıngavırın jáne basqa da dáriler bar. Biraq bul dárilerdi tabý óte qıyn boldy. Kóterme baǵamen jetkizetin kompanııalar óte baıaý jaýap beredi. Soǵan qaramastan, óńirdegi ózge de emdeý oryndaryna qaıtarymsyz kómek berýdi kózdep otyrmyz, – deıdi Talǵat Bekenov.
Al notarıýstar da arnaıy qarjy jınap, demeýshilik kómek kórsetý úshin judyryqtaı jumyldy. Olar ózderi jınaǵan qarjyǵa «ARMED 7F-5L» markaly ottegi konsentratoryn satyp alyp, Jylyoı aýdandyq aýrýhanasynyń ujymyna tapsyrdy.
– Elimizde osyndaı jomart jandar áli de bar. Qıyn kezde qol ushyn sozyp, demeýshilik bildirgen Atyraý oblystyq Notarıattyq palatasynyń tóraıymy Gúlnar Masatovaǵa, sondaı-aq barlyq jeke notarıýsqa alǵysymyzdy bildiremiz. Ottegi konsentratorynyń qaýipti indetke shaldyqqan naýqastardyń tezirek saýyǵyp, otbasyna aman-esen oralýyna septigi tıedi, – deıdi Jylyoı aýdandyq ortalyq aýrýhanasynyń dırektory Nurbek Úkibaev.
Mundaı jomarttyqty Isataı aýdanyndaǵy «Barys» balalar-jasóspirimderdiń deneshynyqtyrý klýbynyń dırektory Ashat Jumabekov te tanytty. Ol ózi turatyn aýdandaǵy aýrýhanaǵa alǵashqy ottegi konsentratoryn syıǵa tartty. Ony Almatydan óz qarjysyna arnaıy aldyrdy. Baǵasy – 550 myń teńge.
– Qazirgideı qıyn kezde dárigerler naýqastardy emdeý úshin kúni-túni eńbek etýde. Meniń ata-anam da osy salada uzaq jyl eńbek etti. Sondyqtan, dárigerlerdiń tynymsyz jumysynyń aýyrlyǵyn jaqsy bilemin. Alaıda, dárigerlerge de keıde múmkindigi bar azamattardyń qoldaýy qajet-aq, – deıdi Ashat Jumabek.
Isataı aýdandyq aýrýhanasynyń dárigeri Serjan Sándibaevtyń aıtýynsha, ottegi konsentratory – emdeý ornynan jetkizilgen alǵashqy qurylǵy. Úzdiksiz ottegi bólip turatyndyqtan, oǵan aýa toltyrýdyń qajeti joq. Osy kezge deıin aýrýhanada mundaı qurylǵy bolmaǵandyqtan, naýqastar arnaıy ottegi ballondary arqyly tynys alypty. Al mundaı ballondardy sanaýly saǵattan soń aýystyryp turý kerek. Ottegi konsentratorynyń joqtyǵy dárigerlerdiń janyna batatyny daýsyz edi.
О́ńirdegi aýrýhanalarǵa kómek kórsetýden munaı-gaz ónerkásibindegi otandyq kompanııa – «Embimunaıgaz» AQ da tartynǵan joq. Kásiporynnyń qoǵammen baılanys qyzmetiniń aqparatyna súıensek, oblystyq aýrýhanaǵa ókpeni jasandy jeldetýge arnalǵan ottegi konsentratorlaryn alýǵa, operasııalyq bloktardy, reanımasııalardy, dıalız ortalyqtary men provızorlyq bólimshelerdi medısınalyq gazben qamtamasyz etý júıesin júrgizý jáne medısınalyq jabdyqtardy satyp alý úshin 146 mln teńge kóleminde demeýshilik kómek kórsetilipti. Sondaı-aq, Jylyoı aýdandyq aýrýhanasyna 35 mln teńge aýdarylǵan. Al óńir turǵyndaryna kórsetilgen kómektiń jalpy somasy 300 mln-ǵa jýyq teńgeni quraǵan.
– Buǵan deıin «Embimunaıgaz» AQ Atyraý qalasynyń Bereke yqshamaýdanyndaǵy karantındik stasıonarlardy turmystyq tehnıkamen, gıgıenalyq qajetti zattarmen qamtamasyz etýge 100 mln teńge bólgen bolatyn. Mahambet aýdanynda qaıtadan ashylǵan provızorlyq ortalyqqa avtobýs berildi. Al oblystyq aýrýhanaǵa 40 ottegi ballony tapsyryldy, – dep habarlady kompanııanyń qoǵammen baılanys qyzmeti.
Atyraý oblysy
