Pýlmonologter koronavırýsqa qarsy antıbıotıkterdi qoldaný týraly ne deıdi?

SARS CoV-2 koronavırýsy úshin ókpe eń osal nysana bolyp tabylady, sondyqtan syrqattanǵandardyń kóbinde ókpeniń zaqymdanýy damyp, keýde jasýshalary aǵzalarynyń KT-da aýrýdyń vırýstyq tabıǵatyna tán "kúńgirt shyny" túrinde zaqymdanatyn ekijaqty prosess retinde sıpattalady. Pnevmonııany kóp jaǵdaıda bakterııalar (pnevmokokktar, stafılokoktar, klebsıel pnevmonııa, gemofıldi taıaqsha jáne t.b.) qozdyrady.

Kardıologııa jáne ishki aýrýlar ǴZI Joǵary oqý ornynan keıingi jáne qosymsha bilim berý departamentiniń basshysy, medısına ǵylymynyń doktory, professor, pýlmonolog dáriger Sáýle Kasenova: "Bakterııalyq pnevmonııa kezinde rentgenogramma jasaǵanda biz ókpeniń bir jaqty, kóbine oń jaqty prosesin kóremiz. COVID-19 kezinde kórinetin ókpeniń zaqymdanýy tek qana syrqattyń belgilerine ǵana emes (sary tústi qaqyryqpen shyǵatyn jótel, zaqymdanǵan jaqtaǵy keýde tusynda aýrýdyń paıda bolýy), sondaı-aq morfologııalyq tabıǵatyna sáıkes kelmeıdi", deıdi dáriger.

Sáýle Laıyqqyzynyń aıtýynsha, koronavırýstyq ınfeksııa kezinde ókpede kóptegen mıkro jáne makrotrombalarǵa negizdelgen gemorragııalyq sındrom anyqtalady, osynyń saldarynan gaz almasý buzylady da, naýqastar demikpeden jáne tynys alý jetispeýshiliginen qınalady. Mamannyń  pikirinshe, pnevmonııa týraly emes, pnevmonıt túrindegi ókpeniń koronavırýstyq zaqymdanýy týraly aıtqan meılinshe durys bolady.

COVID-19 emdeý únemi terapııanyń jańa ádisterin izdeýmen baılanysty

COVID-19 – bul búkil álem úshin jańa kesel. Dárigerler men ǵalymdar klınıkalyq kórinisterdiń tájirıbesin, osy aýrýdy dıagnostıkalaýdyń tásilderi  men emdeýdiń taktıkasyn birlesip jınaqtap otyr. Buǵan halyqaralyq usynymdar men KVI boıynsha qazaqstandyq hattamalar únemi jańartylyp turatyndyǵy dálel.

Sáýle Kasenovanyń aıtýynsha, keshegi ýaqytta buryn bilgenimiz búgingi kúni ózekti bolmaı qalýda, óıtkeni jańa bilimder paıda bola bastady, osy ýaqytqa deıin etıotropty (sebebine áreket etýshi) nemese COVID-19 tikeleı vırýsqa qarsy terapııasy joq, bul aýrýdy emdeý terapııanyń jańa ádisterin únemi izdeýmen baılanysty.

Antıbıotıkterdi baqylaýsyz qoldana berýdiń sońy qaýipti

Sáýle Laıyqqyzy: "KVI kezinde ókpeniń zaqymdanýyn pnevmonııa retinde qate anyqtaý antıbıotıkterdi standartty taǵaıyndaýǵa ákeldi. Bul qate pikir! Naýqastar azıtromısın, seftrıakson jáne sol qaýipti levofloksasındi (rezerv antıbıotıgi) qansha alyp jatqandyǵyn kórip otyrmyz, alaıda olardyń áseri joq. Ony kútýge de bolmaıdy. Antıbıotıkter vırýsqa áser etpeıdi! Bul óte mańyzdy preparattar jáne dárihanalardyń antıbıotıkterdi resepsiz erkin satylýy qaýipti jaǵdaılarǵa ákeledi. Adam naǵyz bakterııalyq ınfeksııamen aýyrǵan kezde bakterııaǵa qarsy preparattar kómektespeıdi!" dedi ol.

Búginde dárigerler KVI patogenetıkalyq terapııasyna (aýrýdy damytý mehanızmderine áreket etý) arnalǵan tásilderdi ózgertti jáne qannyń qoıýlanýyna, trombtardyń paıda bolýyna, ımmýndyq qabynýdyń joǵary belsendiligin tómendetýge qarsy turatyn preparattardy taǵaıyndaıdy da, úmit kúttiretin nátıjeler alady.

KVI kezinde emdelýge jatqyzýǵa jatatyn kórsetkishter

KVI-men aýyratyn adamdardyń 80%-ynda aýrýdyń jeńil túri baıqalady. Bul dene qyzýynyń kóterilýi, tamaqtyń aýyrýy nemese jybyrlaýy, dám men ıisti sezbeý. 2 apta aralyǵynda aýrýdyń beti qaıtady da, aqyryndap kúndelikti ómir súrý tártibine kele bastaıdy.

Sáýle Laıyqqyzynyń aıtýynsha, emdelýge jatqyzýǵa jatatyn kórsetkishke aýrýdyń aýyr aǵymy, ottegi satýrasııasynyń tómendeýi (93%-dan kem bolsa), KT málimetteri boıynsha ókpeniń kóp bóliginiń, keýde jasýshasy aǵzalarynyń zaqymdanýy (50% artyq), júrek yrǵaǵynyń buzylýy, qandaǵy qant deńgeıiniń artýy jáne t.b. jatady. Zerthanalyq tekserý men aspaptyq dıagnostıkalaý ádisterin taǵaıyndaıtyn stasıonarda emdelgen durys. Qan taldaýy, keýde jasýshalary aǵzalarynyń rentgeni aýrý aǵysynyń aýyrlyǵy men asqynýyn jyldam anyqtaýǵa múmkindik beredi.