Altynaı Qaraǵoıshıeva Almatydaǵy perzenthanalardyń birinde akýsher-gınekolog bolyp jumys isteıdi. Aýrýhanaǵa qazir koronavırýspen aýyratyn áıelder ákelinedi. Biraq búginde Altynaı bosanǵan áıelder men jańa týǵan sábıler úshin ǵana emes, sonymen qatar óz otbasyna da aýrý juqtyrmaýy úshin jaýapty, - dep jazdy BUU jańalyqtary.
Altynaı Qaraǵoıshıeva Almaty qalasyndaǵy №1 qalalyq perzenthananyń bosandyrý bóliminde 15 jyldan beri akýsher-gınekolog bolyp jumys isteıdi. Onyń aıtýynsha, bul perzenthana COVID-19 juqtyrýy múmkin júkti áıelderdi bosandyratyn oqshaýlaý orny retinde tańdalǵanda, ol bir sát te oılanbastan, óz qyzmetinde qalamyn dep sheshken.
Qazaqstanda COVID-19 juqtyrýdyń alǵashqy jaǵdaılary osy jyldyń naýryz aıynda Nur-Sultan men Almaty qalalarynda anyqtaldy. Indet anyqtalǵan alǵashqy kúnderi bılik DDU qoldaýymen medısına qyzmetkerlerin pandemııa jaǵdaıynda jumys isteýge daıyndaýǵa arnalǵan oqý kýrstaryn uıymdastyrdy.
Qalalyq densaýlyq saqtaý basqarmasynyń juqpaly aýrýlar jónindegi mamandary Altynaı jumys isteıtin perzenthana qyzmetkerlerin de oqytqan. Onda dárigerler jańa ınfeksııadan qorǵaný jáne COVID-19 indetine shaldyqqan adamdarǵa kómek kórsetý boıynsha tájirıbe aldy.
Ertesi kúni tańǵy altydan bastap bizge COVID-19 dıagnozy rastalǵan adamdarmen tyǵyz baılanysta bolǵan áıelder kelip túse bastady, – dep eske alady Altynaı.
Onyń aıtýynsha, eki kúnnen soń aýrýhanaǵa karantındegi júkti áıelder kelip túse bastaǵan. Olardyń kópshiliginiń jańa koronavırýske tapsyrǵan testi oń nátıje kórsetipti.
"Bul kúni men tórt áıeldi bosandyryp aldym: úsheýi tabıǵı jolmen, al bireýi kesar tiligi arqyly bosandy. Osy áıelderdiń barlyǵy COVID-19 juqtyrǵan edi", - deıdi ol.
Dárigerdiń aıtýynsha, pandemııa bosanatyn áıelderge kómek kórsetý prosesin qıyndatqan. Mysaly, búginde medbıkeler sany qysqarǵandyqtan, bosanatyn áıelderdi emosıonaldy túrde qoldaýǵa ýaqyt jetpeıdi. Tolǵaq kezinde aýyrsynýdy sezinetin áıelder ózderin jalǵyz sezinedi. Medısına qyzmetkerleriniń ózderi de óziniń jáne balalarynyń densaýlyǵyna alańdaıdy.
"Men perzenthanada aýrý juqtyrǵan pasıenttermen jumys isteýden qoryqpaımyn, biraq óz otbasym men balalarym úshin ýaıymdaımyn. Bosanǵan ana men jańa týǵan sábıdiń jaǵdaılary jaqsy ekenin kórgende, óz ýaıymymdy jeńý ońaı bolady", - deıdi Altynaı Qaraǵoıshıeva.
Oǵan táýligine 24 saǵattan qorǵanysh kostıýmimen jáne maskamen jumys isteýge týra keledi. Bul ońaı emes.
"Keıde únemi maska taǵý men respırator qoldanǵannan teri kógerip, qyzarady. Al keıbir áriptesterimde ondaı zattarǵa allergııa bar. Maskany únemi aýystyryp otyrý kerek, sebebi olar ylǵaldy bolady. Bul – búkil álemdegi medısına qyzmetkerleri úshin qıyn ýaqyt. Sonymen qatar, biz bárine ortaq problemamen betpe-bet keldik", - deıdi ol.
Soǵan qaramastan, Altynaıǵa aýrýhanada jumys istegen unaıdy. "Men óte tózimdi adam ekenmin. Qıyndyqtardy jeńe otyryp, óz jumysymdy jalǵastyrǵym keledi. Bul ońaı sharýa emes, biraq anasy balasyn qushaqtap, saǵan alǵysyn aıtqanda, barlyq qıyndyq umytylady", - deıdi Altynaı.
