Bul týraly respýblıkalyq mańyzy bar avtomobıl jolynyń ýchaskelerin tekserý barysynda "QazAvtoJol" UK" AQ basqarma tóraǵasy Ulan Álipov málimdegen.
Uzyndyǵy 363 shaqyrymdy quraıtyn "Qaraǵandy – Balqash" tasjolyn qaıta jańartý jumystary 2019 jyly bastalǵan bolatyn. Qazirgi tańda tasjoldyń barlyq ýchaskelerinde qurylys-montajdaý jumystary belsendi túrde júrgizilip jatyr. Naqtyraq aıtqanda, jer qazý jumystarynyń 73% (22,7 mln tekshe metr) oryndalǵan. Sondaı-aq, joldyń 95 shaqyrymynda jol negiziniń qosymsha qabaty, 41 shaqyrymynda jol negiziniń tómengi qabaty, 68 shaqyrymynda jol negiziniń joǵarǵy qabaty, 58 shaqyrymynda jol jabyndysynyń tómengi qabaty tóseldi. Budan bólek, jolshylar 165 sý ótkizý qubyryn ornatyp úlgergen.
Qaıta jańartýdan ótken soń jol 4 jolaǵy bar I-b tehnıkalyq sanatyndaǵy jolǵa sáıkestendiriletin bolady. Aıta ketý kerek, joldy keńeıtý ýchaskelerdegi apattylyq deńgeıin aıtarlyqtaı tómendetip, joldyń kólikti ótkizý qabiletin birneshe esege arttyra túspek.
Joba 28 kópir men jol ótpeleriniń, 377 sý ótkizý qubyrynyń, demalys alańdary men eldi mekender mańynda ornatylatyn avtopavılondardyń qurylysyn qarastyrady.
Merdigerlik uıymdar – "SP KazGerStroı" jáne CITIC Construction Co.Ltd kompanııalary. Qurylys jumystaryna tehnıkanyń 1720 birligi, 2250 adam jumyldyrylǵan. 500 adam – nysanǵa jaqyn ornalasqan eldi mekenderdiń turǵyndary.
Jolshylardyń aldynda osy jyldyń sońyna deıin avtomobıl jolynyń tolyq boıynda jol jabyndysynyń tómengi qabaty boıynsha qozǵalysty ashý mindeti tur.
