"О́kinishke qaraı, jappaı taraǵan aýrý bizdiń otbasymyzǵa da jetti. Ony tanıtyndardyń bári onyń tereń oı-órisin, jan dúnıesin jáne jaqyn adamdaryna degen qamqorlyǵyn jaqsy biledi. О́te jaqsy ómir súrgen uly adam", - dedi onyń otbasy.
Olar jerleý rásimine tek otbasy músheleri qatysatynyn aıtty. Kenjeǵalı Saǵadıevti eske alýǵa arnalǵan basqa is-sharalar 2021 jyly 25 shildede ótedi. Bul onyń ósıeti eken.
Kenjeǵalı Saǵadıev 1938 jyly 18 aqpanda Qostanaı oblysy, Aqkól aýylynda dúnıege kelgen.
1960 jyly Qazaq memlekettik ýnıversıtetiniń ekonomıka fakýltetin bitirgen. 1966 jyly Plehanov atyndaǵy Máskeý halyq sharýashylyǵy ınstıtýtynyń aspırantýrasyna tústi.
1977 jyly ekonomıka ǵylymdarynyń doktory, 1978 jyly professor, 1994 jyly Qazaqstan Respýblıkasy ulttyq ǵylym akademııasynyń akademıgi ataǵyn aldy. Qazaqstan ǵylymy men tehnıka salasynyń qurmetti qyzmetkeri retinde tanylǵan.
Ol Qazaqstandaǵy 5 iri joǵary oqý ornyn basqardy. Selınograd aýylsharýashylyq ınstıtýty men T.Rysqulov atyndaǵy Qazaq ekonomıkalyq ýnıversıtetiniń rektory bolyp jumys istedi. Qazaq ulttyq agrarlyq ýnıversıteti men Halyqaralyq bıznes ýnıversıtetiniń jáne Halyqaralyq aqparattyq tehnologııalar ýnıversıtetiniń prezıdenti boldy.
Ulttyq ǵylym akademııasynyń bas ǵalym-hatshysy jáne prezıdenti bolyp saılandy. Tehnologııalyq damý jónindegi ulttyq agenttiktiń dırektorlar keńesiniń tóraǵasy atandy.
Parlament májilisiniń úshinshi (2004-2007 j) jáne tórtinshi (2007-2011 j) shaqyrylym depýtaty bolyp saılanyp, májilistegi qarjy jáne bıýdjet komıtetiniń tóraǵasy boldy (2004-2007 j.).
Akademık Saǵadıev óziniń ǵylymı mektebin qurdy. 445-ten astam ǵylymı jumystyń, onyń ishinde 20 monografııa men oqýlyqtardyń avtory. Onyń respýblıkalyq gazet-jýrnal betterindegi jarııalanymdary kópke málim.
Ol ǵalym jáne ekonomıst retinde halyqaralyq arenada tanymal. AQSh-tyń Nıý-Iork akademııasy men Amerıkalyq ekonomıkalyq ǵalymdar qaýymdastyǵynyń múshesi, Pákistan ǵylym akademııasynyń akademıgi, Halyqaralyq joǵary bilim akademııasynyń akademıgi bolyp saılanǵan.
