Elorda • 27 Shilde, 2020

Elordada KVI boıynsha jedel járdem shaqyrý sany 5 ese azaıdy

26 ret kórsetildi

Tósek-oryn qajettiligi 90%-dan 45%-ǵa tómendegen. Bul týraly elorda ákimdiginiń resmı saıtyny silteme jasaı otyryp Egemen.kz habarlaıdy.

Karantın sharalary men ambýlatorııalyq emdeýdi kúsheıtý nátıjesinde aýrýhanalar men dárigerlerdiń júktemesi azaıǵan. Elordada 27 shildege deıin KVI juqtyrǵan 10 070 naýqas tirkeldi. Onyń ishinde 6766 adam nemese 67%-y saýyǵyp, aýrýhanadan shyǵaryldy, 966 adam qala aýrýhanalarynda em alýda. 5 shildeden bastap ınfeksııalyq jáne provızorlyq stasıonarlarda emdelip jatqandar sany 48% (3357-den 1758 adamǵa deıin) azaıǵan.

Sáıkesinshe tósek-oryn qajettiligi 90%-dan 45%-ǵa deıin tómendep, bos tósek-oryn sany 369-dan 2000-ǵa deıin artqan. «Pnevmonııamen túsken stasıonarlyq emdegi naýqastar sany 44% (1333-ten 746-ǵa deıin) azaıdy. Jedel járdem stansııasyna júginetinder 53% (táýligine 3410-nan 1608-ge deıin), shaqyrýlar 56% (táýligine 2368-den 1039-ǵa deıin), KVI boıynsha shaqyrýlar sany táýligine bes ese – 350-den 73-ke deıin azaıdy.

Biraq indet eshqaıda ketken joq. Sondyqtan karantın sharalaryn qatań saqtaý qajet: maska taǵyp, áleýmettik qashyqtyq saqtaǵan jón», – dedi Nur-Sultan qalalyq qoǵamdyq densaýlyq saqtaý basqarmasy basshysynyń m.a. Álııa Rústemova búgingi brıfıngte. Nur-Sultan qalasynda koronavırýs ınfeksııasyn anyqtaý úshin PTR-testileýdi toǵyz zerthana júrgizedi.

Onyń ishinde jeti memlekettik, eki jeke zerthana. Olardyń jalpy qýattylyǵy 5,5 myń zertteýge deıin. Pandemııa kezinde 284 myń PTR test alyndy. Sońǵy úsh apta ishinde zerthanalarda táýligine ortasha 2500 test jasalady. Bul maýsym aıyna qaraǵanda 30%-ǵa tómen (sany 3500). Qalanyń barlyq emhanalarynda provızorlyq bólimsheler uıymdastyrylǵan.

Onda JRVI jáne pnevmonııa belgileri bar naýqastardan jaǵyndy alynady. Sondaı-aq mobıldi brıgadalar da quryldy, olar úıde sımptomsyz vırýs tasymaldaýshylardan, sondaı-aq COVID-19 naýqastarymen jaqyn qarym-qatynasta bolǵan adamdardan materıal alady.

"Búginde Nur-Sultan qalasynda PTR test tapsyrý problemalary joq. Qazirgi ýaqytta qala ákimdigi qosymsha zerthanalyq qural-jabdyqtardy satyp alý esebinen elorda turǵyndary úshin testilik zertteý sanyn arttyrý boıynsha jumys júrgizýde. Sonymen qatar koronavırýs ınfeksııasynyń belgileri men epıdemıologııalyq anamnez bolmaǵan jaǵdaıda PTR test tapsyrýdyń qajeti joq", dep atap ótti Á.Rústemova.

Sońǵy jańalyqtar

Elorda «jasyl» aımaqqa ótti

Koronavırýs • Keshe

Uqsas jańalyqtar