О́zgeniń ómiri úshin basyn qaterge tige júrip indet tyrnaǵyna ilinip, ózi jumys isteıtin ınfeksııalyq bólimde kóz jumǵan medbıkeniń biri – Elena Novoselova. Buǵan deıin Jitiqara mektepteriniń birinde medbıke bolyp júrgen Elena qalaǵa tótenshe jaǵdaı rejimi engizilisimen koronovırýs indetine qarsy kúreske bel sheship kirisken áriptesteriniń aldyńǵy qatarynda boldy. Sáýir aıynyń sońynda eń alǵashqylardyń biri bolyp koronavırýs belgisi anyqtalǵan naýqastar jatatyn arnaıy bólimge aýysyp keldi.
– Elena Anatolevna kóp jyldyq eńbek tájirıbesi bar bilikti maman edi. Áriptesterinen eshqashan kómegin aıamaıtyn. Jumys barysynda, ıá basqa kezde bolsyn aınalasyna únemi shýaq shashyp, ásirese jas medbıkelerge qamqor bolyp júretin. Naýqastyń jaı-kúıin qabaǵynan tanıtyn naǵyz dáriger maman edi. Lena apaıdy búkil ujym bolyp erekshe qurmet tuttyq. Elena Anatolevna 1965 jyly 31 mamyrda Jitiqara qalasynda dúnıege keldi. 30 jyl ǵumyryn týǵan jerindegi aýdandyq aýrýhana qabyrǵasynda ótkizgen bilikti medbıke ómiriniń sońyna deıin antyna adal bolyp, aqtyq demi qalǵansha koronavırýs ınfeksııasyna qarsy kúresti, – deıdi aýdandyq aýrýhananyń bas dárigeri Rústem Aıtbaev.
Aq jeleńdi abzal jannyń erligin memleket eleýsiz qaldyrǵan joq. Elena Anatolevna Novoselova qyzmettik boryshyn óteý kezindegi tabandylyǵy men jankeshtiligi jáne memleket pen halyqqa sińirgen ólsheýsiz eńbegi úshin el Prezıdenti Qasym-Jomart Toqaevtyń Jarlyǵymen «Qurmet» ordenine laıyq dep tanyldy. Joǵary memlekettik marapatty aýdan ákimi Abaı Ybyraev marqumnyń qyzy Vıktorııaǵa tabys etti. Saltanatty rásimge orden ıesiniń otbasy men týystary, densaýlyq saqtaý bólimi men bilim berý bóliminiń basshylary qatysty.
– Koronavırýsqa qarsy kúresip jatqan dárigerdiń ár kúni – erlik. Biz Elena Anatolevnanyń jarqyn beınesin eshqashan umytpaımyz. Ol boıyndaǵy izgilik shýaǵyn ózimen birge ala ketken joq. Kózi tirisinde aralasyp, bilisken aınalasyndaǵy adamdarǵa amanattap qaldyryp ketti. Keń júrekti, isine adal dárigerdiń ónegeli ómiri men umytylmas isin maqtan tutyp, keıingi urpaqqa úlgi etetin bolamyz. Búginde aýrýhana ujymy koronavırýsqa qarsy kúresti jalǵastyrýda. Provızorlyq, ınfeksııalyq stasıonarda tósek-oryndar men dári-dármek jetkilikti. Ár adamnyń qaýipsizdigi qarastyrylǵan. Adamdardyń jaýapkershiligin arttyrý kerek. Jasyryn jıyn, tasada toı-tomalaq ótkizý degendi múlde doǵarý kerek. Búgingi tańdaǵy eń basty másele osy bolyp tur. Árqaısymyz abaı bolyp, ózimizdi ózimiz kútip, aınaladaǵy jaqyn adamdardyń jaǵdaıyn oılaýymyz kerek. Búkil qaýipsizdik sharasyn qoldaný kerek, – dedi aýdan ákimi.
– Bala kezimizde aǵam Petr ekeýmizge úıde kóbine ákemiz qaraıtyn. Anam kóbine jumysta júretin. Ýaqyt degen ómir ǵoı. Anam qamshynyń sabyndaı qysqa ǵumyrynyń kóbin aýrýhanadaǵy naýqastarǵa arnady. Úıge qatty sharshap keletin. Oǵan biz de úırenip kettik. Bizdiń basymyzǵa túsken aýyr qaıǵyǵa búkil el ortaqtasyp jatyr. El ishindegi birlik, baýyrmaldyq degendi adam osyndaıda túsinedi eken. Memleket basshysy Qasym-Jomart Toqaevtyń ózi asyl anashymnyń eńbegin joǵary baǵalap, «Qurmet» ordenin berip jatyr. Bul – bizdiń otbasymyz úshin úlken maqtanysh. Bálkim anam sııaqty medısına qyzmetkeri bolmaspyn, biraq óz Otanyn shyn súıetin adal azamat bolý –paryzym, – dedi kópshilik aldynda tolqı sóılegen marqumnyń qyzy Vıktorııa.
Iá, ólgender orden taqpaıdy. Biraq bul orden qyzmet babynda júrip pandemııa qurbanyna aınalǵan qaısar medbıkege degen el qurmetine qoıylǵan eskertkish.
Qostanaı oblysy,
Jitiqara qalasy
