Onlaın otyrysty ashqan Aqparat jáne qoǵamdyq damý mınıstri Aıda Balaeva halyqtyń densaýlyǵy qorshaǵan ortanyń tazalyǵymen tikeleı baılanysty ekenin atap ótti.
«Adam boıyndaǵy túrli aýrýlardyń qorshaǵan ortadaǵy keleńsiz ózgeristerge tikeleı nemese janama túrde baılanysty ekeni anyqtalǵan. Alaıda osy jaǵdaıǵa, halyq densaýlyǵynyń nasharlanýyna ekologııalyq faktorlardyń sebep bolatyny ázirge elimizde jetkilikti deńgeıde eskerilmeı keledi. Ekologııalyq saýatsyzdyqty joıý halyq arasynda júrgiziletin mańyzdy máselege aınalýy tıis. Tabıǵat pen qorshaǵan ortany qorǵaý máselesi jalpyhalyqtyq ekologııalyq saýat ashý, jastarǵa úzdiksiz bilim berý nátıjesinde ǵana sheshiledi», dedi vedomstvo basshysy.
Jıynda sóz alǵan eko belsendi Arman Haırýlın kelesi jyldy Ekologııa jyly dep jarııalaýdy usyndy. Onyń oıynsha, sońǵy 20 jyl ishinde Ekologııa jyly jarııalanbaǵan. «Biz kórshimiz О́zbekstannan halyqtyń ósimi boıynsha birneshe esege artta qalyp kele jatyrmyz. Bul problema shyn máninde dál osy ekologııalyq jaǵdaıdan týyp otyr. Biz asharshylyqty genosıd dep tanysaq, qazir sol náýbetpen para-par ekosıd jaǵdaıynda turmyz. Sondyqtan naqty iske kirisetin kez keldi. Eger Ekologııa máselelerimen aınalysatyn arnaıy mınıstrlikti qurǵan Prezıdentimiz Q.Toqaev kelesi jyldy ekologııa jyly dep jarııalasa, biraz negizgi túıtkilderdiń túıini tarqatylar edi», dedi.
Memleket basshysy Q.Toqaevtyń tapsyrmasymen Bilim jáne ǵylym mınıstrliginde arnaıy qurylǵan jumys toby ekologııa pánin mektep baǵdarlamasyna engizý boıynsha jumysty bastady. Biraq ECO Network jobasynyń negizin qalaýshy Evgenıı Muhamedjanov ekologııalyq bilim máseleni tolyǵymen sheshpeıtinin jetkizdi. «Ekologııany qorǵaýǵa baǵyttalǵan jumystardy júrgizýge memleketten qarjy bólýdi qoıý kerek. Onyń eshqandaı nátıje bermeıtinin, jaı ǵana Úkimet qarjysyn jelge ushyratynyn tájirıbeden anyq kórdik. Negizi, ekologııany qorǵaý ár adamnyń ózinen bastalýy kerek. Men, mysaly, ózimniń jeke kóligimdi tastadym. Qazir qoǵamdyq kólikpen júremin», dedi ol.
Osyǵan qaramastan keıingi urpaqqa ekologııalyq bilim berý qashan da, qaı elde de ózekti bolyp otyr. Sonyń bir dáleli bolar, dóńgelek ústelge Reseıden qatysqan tanymal ekobloger Roman Sablın onlaın-mektepterdiń jumysy nátıje beretinin, sondaı-aq osy tájirıbeni Qazaqstanǵa da engizýge bolatynyn aıtty. Qazir ekologııalyq bilim beretin reseılik onlaın-mektepterde qazaqstandyq oqýshylar da oqıdy eken.
