Qalalyq din isteri basqarmasy qasıetti Qurban aıt merekesi qarsańynda qurban shalý tártibin túsindirdi.
Sanıtarlyq-epıdemııalyq ahýalǵa baılanysty qala meshitterinde 31 shilde kúni Qurban aıt namazy oqylmaıdy. Qoǵamdyq qaýipsizdikti, adamdardyń kóp jınalmaýyn qamtamasyz etý maqsatynda qala aýmaǵynda ornalasqan dástúrli qurban shalý oryndary (bazarlar, sharýa qojalyqtary) jabyq bolady.
«Osy oraıda, alǵash ret qashyqtan qurban shalýdy uıymdastyrý maqsatynda qurban2020.kz saıty iske qosyldy. Atalǵan saıtta kez kelgen azamat onlaın túrde qurban shalýǵa tapsyrys bere alady. Qurbandyqqa soıylǵan et túgeldeı áleýmettik kómekke muqtaj otbasylarǵa úlestiriledi», delingen habarlamada. Qurban2020.kz saıtynda muqtaj jandarǵa arnaıy «Qurbandyq etin alý úshin ótinish qaldyrý» fýnksııasy da iske qosyldy. Tıisti qujattardy júkteý arqyly muqtaj otbasylar áleýmettik kómek alý úshin onlaın ótinish joldaı alady.
Sonymen qatar elorda aýmaǵyna satý maqsatynda iri qara mal men qoı kirgizý shekteledi. Din isteri basqarmasy turǵyndardy sanıtarlyq-epıdemııalyq qaýipsizdik erejelerin saqtaýǵa shaqyrady.
Bıyl Qurban aıt merekesi 31 shilde men 2 tamyz aralyǵynda ótedi.
