Koronavırýs • 04 Tamyz, 2020

Statıstıkanyń dáldigi indetke qarsy is-sharalardy naqtylaıdy

32 ret kórsetildi

Qaýpi seıilmegen zaýaldyń tıgizip jatqan zardaby orasan. Memleket basshysy Qasym-Jomart Toqaev keshe týıtterdegi paraqshasynda osy dertten qaıtys bolǵan azamattardyń qazasy qabyrǵasyna batatynyn, koronavırýs pen ókpe qabynýynan kóz jumǵandardyń sany áli de joǵary ekenin aıtty. Prezıdenttiń pármenimen tamyzdan bastap pandemııanyń taralý aýqymyn naqty baǵamdaý úshin koronavırýs pen ókpe qabynýynyń statıstıkasy birizdendirildi.

Kollajdy jasaǵan Amangeldi Qııas, EQ

Shyrǵalań shaqta ókpesi qa­byn­ǵandardyń qatary tym kóbeıip, sonyń salda­rynan qaıtys bolǵandar az bolmady. Biraq pnevmonııaǵa shal­dyq­qandar­dan PTR-test nátıjesinde KVI anyq­­tal­maǵandyqtan, bul naýqastar Sovid-19 boıynsha jalpy statıstıkaǵa alynbady. Alaıda kópshilik munda bir kiltıpan baryn, dem jetpeı jany qysylǵandardyń kúrt kóbeıýine osy báleket indettiń yqpal etkenin aıtyp dabyl qaqty.

Bul másele Memleket bas­shy­synyń nazarynan tys qalmady. Sodan statıs­tıkany birizdendirý qolǵa alynyp, Densaýlyq saqtaý mınıstrligi 1 tamyzdan bastap KVI-ge shaldyqqandardyń deregin jańa ádispen jınaqtaı bastady. Aýrýlardyń halyqaralyq jiktemesiniń jańa kodtary negizinde zerthanada anyqtalǵan KVI men PTR-test nátı­jesi taza bolǵanymen, pnevmonııaǵa shaldyqqan naýqastar birge esepke aly­nady. Koronavırýs ınfeksııasyn kod­taý algorıtmine sáıkes, qazir zerthanada anyqtal­ǵan jaǵdaılarǵa U07.1 kody jáne rastalmaǵan nemese yqtı­mal jaǵdaılarǵa U07.2 kody qolda­nylady. Birinshi jáne ekinshi kod qoıylǵan naý­qastar Sovid-19 juqtyrǵan dep esep­te­ledi.

Statıstıkany jańa ádispen júrgizý­diń jaı-japsaryn Den­saýlyq saqtaý mınıstri Alekseı Soı Ortalyq kommý­nıkasııalar qyzmeti alańynda aıtyp berdi.

«Dúnıejúzilik densaýlyq saqtaý uıymynyń keńesimen biz 2020 jyldyń 1 tamyzynan bastap KVI men pnevmonııa boıynsha statıstıkany biriktirý týraly sheshim qabyldadyq. Kóp adam DDU bul týraly 18 shildede habarlasa, Qazaqstan statıstıkany nelikten 1 tamyz­dan bastaǵaly jatyr deıdi.

Sebep mynada: bizge kodtaý men pa­sıentterdi tirkeý júıesiniń senimdiligin qamtamasyz etý algo­rıtmin ázirleý úshin qazirgi aqpa­rat­tyq júıeni baptap, jańa má­li­metterdi engizý úshin per­so­nal­dy daıyndaýǵa eki aptaǵa jýyq ýaqyt kerek boldy. Bul – óte kúrdeli ári kóp kúshti talap etetin
sharýa. PTR-testten anyqtalǵan nátıjeni tirkeý ońaı bolǵanymen, rastalmaǵan koronavırýs pnevmonııasyn anyq­taý qıyn. Bizdiń aldymyzda az ýaqyttyń ishinde dárigerlerdi ko­ronavırýs pnevmonııasynyń bel­gilerin anyqtap, ony esep júıesine tirkeý mindeti turdy. Biz bul jumysty atqardyq. Endigi kezekte DDU-nyń sońǵy standarttaryna sáıkes naýqastardyń bárin tirkeýge daıynbyz», dedi A.Soı.

Joǵaryda halyqaralyq jik­te­me boıynsha koronavırýs jaǵ­daı­laryn kodtaý algorıtmine qysqasha toqtaldyq. Mınıstrdiń aıtýynsha, qazir U07.1 kodyn rastalǵan jaǵdaılar úshin, al U07.2 kodyn rastalmaǵan nemese yqtımal jaǵdaılar kezdeskende qoldanamyz. Bul rette birinshi kodtyń anyqtamasy óte aıqyn. Biraq U07.2 kody koronavırýs ınfeksııasynyń epıdemııalyq belgilerine baılanysty, ıaǵnı pasıent aýrý juqtyrǵan adamdarmen baılanysta bolǵany, sondaı-aq dene qyzýy, qurǵaq jó­tel, ıntoksıkasııa, tynys alý jetki­lik­sizdigi sııaqty klınıkalyq belgi­lerine qaraı aıqyndalady. Bul ádis aýrýǵa qatysty ahýaldy durys boljap bilýge, qajetti resýrstardy, medı­sı­nalyq kadrlar men tósek oryn­dardy, medısınalyq bu­ıymdar­dy, dári-dármekti durys josparlap, sta­tıs­tıkanyń ashyq­tyǵyn qamtamasyz etýge múm­kindik beredi.

 

Juqtyrǵandardyń 70 %-ǵa jýyǵy jazyldy

«Endi sandar týraly aıtaıyn. Men osynaý kóp aqparatqa bas qatyrmaı, qysqasha ǵana jetkizýge tyrysaıyn. Búgingi tańda respýblıkada koronavırýs ınfeksııasyn juqtyrýdyń 92 662 jaǵdaıy tirkeldi. Iá, bul san úreı týdyrýy da múmkin. Alaıda olar­dyń 67 paıyzdan kóbi aýrýdan saýy­ǵyp shyqty. Mundaı jaǵymdy kórsetkishter baıaý bolsa da ósip keledi. Jaǵdaı Batys Qazaqstan, Almaty, Túrkistan, Qostanaı, Aqmola jáne Mań­ǵystaý oblystarynda, sondaı-aq asta­nada ońalyp keledi. Osylaısha Qazaq­standa KVI juqtyrý boıynsha jaǵdaı turaqtaldy dep tolyq senimmen aıta alamyz. Indettiń sharyqtaý shegi­nen óttik. Bizdiń mindetimiz – búkil adam úshin, búkil densaýlyq saqtaý júıesi úshin óte qıyn synaqpen kelgen osy pozısııany ustap qalý», dedi vedomstvo basshysy.

 

15 stasıonar jabyldy

Sonymen qatar Alekseı Soı taǵy bir jaǵymdy jańalyq re­tinde ınfek­sııalyq jáne pro­vı­zor­lyq tósektik oryndardyń bosaı bastaǵanyn atap ótti. Osy jyldyń maýsym aıynda el­degi keıbir aýrýhanada jaǵdaı qatty ýshyǵyp ketken edi. Búgingi tańda stas­ıonarlardyń 34 paıyzynda ǵana naý­qastar jatyr. Buǵan tósektik oryn­darynyń qoryn 48 997-ge deıin arttyrý esebinen qol jetkizilip otyr. Osy­laısha Qazaqstannyń 7 óńirinde 15 sta­­sıonar jabylyp, qaıta qury­lym­­daldy.

Mundaı oń dınamıka jedel járdem qyzmeti salasynda da baıqalady. Maý­sym aıynyń sońynda respýblıkada jedel járdem qyzmetin shaqyrýdyń jaǵdaıy 30 myńǵa deıin jetip edi. Karantınniń sońǵy eki aptasynda jedel járdem qyzmetine júginýdiń jalpy jaǵdaıy eki ese azaıdy.

«Dárigerlerdiń altynǵa bergi­siz ere­jesin este ustaǵan abzal: aýyryp em izdegenshe, árdaıym aýyrmaýdyń amalyn izdegen durys. Eń birinshi kezekte bul Sovid-19 aýrýyna tikeleı baılanysty támsil. Kóp adam medısına qyz­metkerlerine ótemaqy berer kezde tamyzǵa, ıaǵnı koronavırýs pen pnevmonııa statıstıkasy biriktirilgenge deıin anyqtalǵan adamdar odan syrt qalmaı ma degen suraq qoıyp jatyr. Biz bul baǵytta jumys júrgizip jatyr­myz. Mindetti túrde máseleni jiti zert­teımiz. Árbir jaǵdaı jeke taldanady. Áriptesterimizdiń eshqaısysy bul másele boıynsha alańdamaı-aq qoısyn. Kóp ýaqyt ótpeı kúz keledi. Bul statıs­tıkada ótemaqy men tólem­aqy ǵana emes, eń birinshi kezekte resýrstardy bólý, boljaý, dıagnostıka men aýrý­­ha­naǵa jat­qy­zý máseleleri qam­tylady. Bul mindetter – qazir­gi ýaqytta basty mańyzǵa ıe», dedi Alekseı Soı.

Sonymen qatar jıynǵa DDU-nyń Qazaqstandaǵy ókildiginiń basshysy, doktor Kerolaın Kla­rın­val qatysyp, jańa jiktemege qatysty keńinen aıtyp berdi.

 

DDU joǵary baǵalady

«Dúnıejúzilik densaýlyq saq­taý uıymy Qazaqstannyń DDU-nyń jańa jiktemesin Sovid-19 aýrýyna shal­dyǵý kúdi­gi bar pasıentter úshin paı­dala­ný týraly sheshimin joǵary ba­ǵalaıdy. Bul – álem boıynsha máli­metterdi jınaýdy standarttaý úshin óte mańyzdy qadam. Qaıta saralaý koronavırýs ınfeksııasy jaǵdaıynyń kóbeıýin kórsetetinine qaramastan, bul epıdemııalyq prosesti jaqsy túsinýge, resýrstardy jaqsyraq bólýge, ulttyq jáne aımaqtyq deńgeılerde jaýaptardy dál josparlaýǵa múmkindik beredi. Naýqastar mamandandyrylǵan aýrý­hanalarda emdelýge jedel qol jetkize alady. DDU Qazaq­­s­tannyń aq­parat almasýda tanyt­qan ashyqtyǵyn qoldaıdy. Vırýs áli de halyq arasynda taralýda. Tek ortaq kúsh-jigermen osy pandemııany eńsere alamyz. Ár adamnyń qosqan úlesi óte mańyzdy. Dúnıejúzilik den­saý­lyq saqtaý uıymy Úki­met­­pen jáne Densaýlyq saqtaý mınıs­t­r­ligimen jumysty jal­ǵas­­ty­rady», dedi Kerolaın Kla­rın­val.

Suraq-jaýap barysynda jýr­na­lıster koronavırýs pen pnev­mo­nııanyń jalpy statıstıkasy nege biriktirilmedi degen saýaldy jıi qoıdy. Densaýlyq saqtaý vıse-mınıstri Ajar Ǵınııat bul statıstıkany biriktirý qıynǵa soq­paıtynyn, tek halyq ekeýiniń ara-jigin túsinip, PTR-testten KVI anyqtalmasa da beıqam júrý­ge bolmaıtynyn uǵyný ma­ńyz­­dy ekenin atap ótti.

3 tamyzdaǵy jaǵdaı boıyn­sha bir táýlik ishinde korona­vı­rýs ın­fek­sııa­synyń 1069 zert­ha­nalyq rastal­ǵan jaǵdaıy jáne PTR-testten anyq­talmaǵan koronavırýs pnevmonııa­sy­nyń 798 jaǵdaıy tirkeldi. Bul rette ras­talǵan koronavırýs ınfeksııa­sy­nan ólim-jitim kúnine 34 jaǵ­daı­dy qu­rady, al zerthanalyq rastalmaǵan KVI tárizdi pnevmonııadan bir kúnde 21 adam kóz jumdy.

Sońǵy jańalyqtar

Aq úıdiń alǵashqy meımany

Álem • Búgin, 12:15

ShQO-da mal urylary ustaldy

Aımaqtar • Búgin, 11:00

Uqsas jańalyqtar