Aıtýynsha, jaqynda ǵana ol "Qazposhta" arqyly Nur-Sultan qalasyndaǵy qarjy uıymy notarıýsynan hat alǵan.
– Hatta meniń Nur-Sultandaǵy "Shaǵyn qarjy uıymyna" 20 kún merzimge 30 myń teńge kóleminde nesıe resimdegenim jazylypty. О́z basym astana turmaq, Qostanaıdyń ózinde eshbir nesıe alyp kórgen emespin. Internetti aqtaryp otyryp, álgi uıymnyń telefon nómirin taýyp aldym. Biraq eshkim jaýap bermedi. Odan keıin hattan notarıýstyń baılanys nómirin taýyp, habarlasyp edim, ol maǵan aryzdanýshynyń nómirin berdi. Aryzdanýshynyń aıtýynsha, men shilde aıynyń besi kúni nesıe resimdeppin. Men eshbir nesıe resimdemegenimdi aıtpaq bolyp edim, operator telefon tutqasyn qoıa saldy. Endi men nesıe tólemin ýaqytynda ótemegenim úshin negizgi qaryzdyń ústine ósimpul ústep, 45 232 teńge tóleýim kerek. Onsha kóp aqsha emes, biraq men ony alǵan joqpyn. Sonda, ne úshin tóleýim kerek? Banktiń ózi nesıe aqsha aýdarylǵan esepshotty tekserip, aqshanyń kimniń qaltasyna túskenin op-ońaı anyqtaı alady ǵoı, - dedi B. Álekenova.
Aıdaladaǵy áldekimderdiń alaıaqtyq áreketiniń qurbanyna aınalǵan Balsulý qazir polısııaǵa shaǵym túsirip, notarıýsqa qarsy hat daıyndap jatyr.
- Polısııaǵa shaǵymdanyp edim, olar mundaı qylmys túrlerin ashý múmkin emes dep otyr. Internet alaıaqtarynyń quryǵyna túsken shaǵymdanýshylar mensiz de kóp eken. Endi notarıýstyń hatyna qarsy hat jazyp, advokat jaldaýǵa týra keledi. Biraq munyń bárine aqsha kerek. Búıtip áýre bolǵansha, qarjy uıymy talap etip otyrǵan aqshany tólep qutylý jeńil shyǵar dep te oılap qoıamyn. Qazirgideı onlaın álemde bizdiń jeke málimetterimizdi alaıaqtar op-ońaı óz múddelerine paıdalanýda. Sondyqtan jeke kýálikte kórsetilgen málimetterińizdi qupııa saqtaýǵa tyrysyńyzdar, - deıdi Balsulý. Ádildik izdep, áýre-sarsańǵa túsken Balsulý «Qazposhtadan» ınternet alaıaqtarynyń toryna túsken ózi sııaqty taǵy bir turǵyndy kezdestirgenin aıtady. Ol azamatsha da aqysyn óz esebinen tólep notarıýske qarsylyq hatyn jiberipti. Advokattyń qyzmeti 50 myń teńge turady eken. Alaıaqtar bul qyzdyń atyna 2 birdeı nesıe resimdep jibergen. Basyna ashyq kúnde jaı túskendeı bolǵan Balsulý bir jarym kúnniń ishinde shaǵyn nesıe beretin uıymdardyń nemese áldebir alaıaqtardyń qurbanyna aınalǵan 5 adamdy izdep tapqan.
Qostanaı oblysy
