Vıdeokonferensııa formatynda ótken jıynda fýtboldan áıelder arasynda Qazaqstan chempıonatyn ótkizý jáne quramalardyń qurlyqtyq týrnırlerin ótkizý máseleleri qaraldy. Basqosýdy QFF Áıelder fýtbolyn damytý komıtetiniń tóraǵasy Baýyrjan Ábdýbaıytov pen QFF buqara, áıelder jáne jasóspirimder fýtboly departamentiniń dırektory Erlan Jamantaev júrgizdi.
«Bizdiń jospar boıynsha áıelder arasyndaǵy Qazaqstan ulttyq chempıonatyn 28 tamyzda bastaý josparda bar. Árıne, basty másele sanıtarııalyq-epıdemıologııalyq jaǵdaıdyń dınamıkasyna kelip tireledi. Qazaqstan chempıonatyna 6 komanda qatyspaq. Jarystar bir qalada jáne eki aınalymnan turmaq», - deıdi QFF buqara, áıelder jáne jasóspirimder fýtboly departamentiniń dırektory Erlan Jamantaev.
«Bıyl U17 jáne U19 jasóspirimder quramalaryna arnalǵan eýropalyq irikteý týrnıriniń ótetindigi tamyz aıynyń ekinshi jartysynda belgili bolady. Buǵan deıin ÝEFA Atqarýshy komıteti kún tártibinde osy jas sanattaryndaǵy komandalardyń jarystaryn 2021 jylǵa aýystyrý týraly usynys bolatynyn málimdedi», - dep túsindirdi QFF Áıelder fýtbolyn damytý komıtetiniń tóraǵasy Baýyrjan Ábdýbaıytov.
Fýtboldan Qazaqstan áıelder quramasy Eýropa chempıonatynyń irikteý kezeńindegi kezekti oıynyn 22 qyrkúıekte Avstrııamen ótkizedi.
