Nur-Sultan qalasy ákiminiń grantyn qalaı ıelenýge bolady?

2018 jyldan bastap ákimdik joǵary oqý oryndarynda qala úshin asa qajet mamandyqtarǵa memlekettik tapsyrysty ornalastyra bastady. Ol úshin qala ákiminiń tóraǵalyǵymen táýelsiz komıssııa qurylyp, oǵan qalalyq basqarmalardyń, qoǵamdyq uıymdardyń basshylary men Kásipkerler palatasynyń ókilderi kirdi.

Nur-Sultan qalasynyń ákimi 2020-2024 jyldarǵa joǵary jáne joǵary oqý ornynan keıingi bilim alýǵa 793 grant bóldi. Konkýrstyq komıssııanyń qorytyndysy boıynsha, mamandardy daıarlaýǵa memlekettik bilim berý tapsyrysy ornalastyrylatyn joǵary oqý oryndarynyń tizimi anyqtaldy. Tizimmen tómende tanysýǵa bolady.

Joǵary bilimniń bilim berý grantyn berýge arnalǵan konkýrsqa qatysý úshin oqýǵa túsýshi joǵary jáne (nemese) joǵary oqý ornynan keıingi bilim berý uıymdarynyń (budan ári – JJOKBU) qabyldaý komıssııasyna nemese aqparattyq júıe arqyly joǵary bilim alý úshin 10-20 tamyz aralyǵynda jáne joǵary oqý ornynan keıingi bilim alý úshin 24 tamyz - 2 qyrkúıek aralyǵynda qujattardy tapsyrady:

1) belgilengen úlgidegi blankide ótinishti;

2) bilimi týraly qujatty (qujattardy qabyldaý komıssııasyna tapsyrǵan kezde tólnusqa);

3) UBT sertıfıkatyn (qujattardy qabyldaý komıssııasyna tapsyrǵan kezde);

4) 086-Ý nysany boıynsha medısınalyq anyqtamany;

5) jeke basyn kýálandyratyn qujattyń kóshirmesin tapsyrady.

Memlekettik bilim berý tapsyrysy negizinde JJOKBU-nyń tildik daıarlyqty kúsheıtýge arnalǵan daıarlyq bólimderin bitirgen tulǵalar JJOKBU-nyń rektory qol qoıǵan bitirgeni týraly transkrıpt usynady.
Tehnıkalyq jáne kásiptik, orta bilimnen keıingi bilimniń bilim berý baǵdarlamalaryn iske asyratyn bilim berý uıymdarynyń bilim týraly qujattary bar, biliktiligin rastaǵan jáne tıisinshe mamandyq boıynsha keminde bir jyl jumys ótili bar tulǵalar qosymsha myna qujattardyń bireýin tapsyrady:

1) eńbek kitapshasy;

2) uıymnyń mórimen (eger bar bolsa) kýálandyrylǵan jumys berýshiniń qoly qoıylǵan qyzmettik tizim (qyzmetkerdiń jumysy, eńbek qyzmeti týraly málimetter tizbesi);

3) qyzmetkerdiń eńbek qyzmeti týraly aqparat kórsetilgen arhıvtik anyqtama;

4) biryńǵaı jınaqtaýshy zeınetaqy qorynan aýdarylǵan mindetti zeınetaqy jarnalary týraly úzindi jáne Memlekettik áleýmettik saqtandyrý qorynan alynǵan áleýmettik aýdarymdar týraly málimetter;

5) jumys berýshi toqtatylý kúni men negizdemesi týraly belgi qoıǵan eńbek sharty;

6) jumys berýshiniń aktilerinen eńbek shartyn jasasý jáne toqtatý negizinde eńbek qatynastarynyń týyndaýy men toqtatylýyn rastaıtyn úzindiler;

7) jumyskerlerge jalaqy tóleý vedomosynan úzindiler.

"Joǵary bilimniń bilim berý grantyn berýge arnalǵan konkýrsqa qatysý úshin oqýǵa túsýshi ótinishte ózi tańdaǵan joǵary bilimniń berý baǵdarlamalarynyń tobyn jáne JJOKBU-ny kórsetedi. Beıindik pánder sáıkes kelgen jaǵdaıda, oqýǵa túsýshi bilim berý baǵdarlamalarynyń tórt tobyna deıin kórsete alady", dep habarlady bilim basqarmasy ókilderi. 

JOO bólingen granttar tizimin elorda ákimdiginiń resmı saıtynan alýǵa bolady. http://astana.gov.kz/kz/news/news/24080