Marapattaý rásiminde Arhımed Muhambetov indetke qarsy kúrestiń eń aldyńǵy shebinde medısına qyzmetkerleriniń júrgenin atap ótti.
- Qazir búkil álem koronovırýs ınfeksııasynyń etek alýyna baılanysty asa kúrdeli kezeńdi bastan keshirip jatyr. Qurmetti medısına qyzmetkerleri, sizder adam ómiri men densaýlyǵy úshin bolyp jatqan kúrestiń únemi aldyńǵy qatarynda bola bildińizder.
Búginde oblystyń densaýlyq saqtaý salasynda 15 myń medısınalyq qyzmetker eńbek etedi. onyń 1800-i dáriger mamandar bolsa, 6 myńnan astamy – orta medısına qyzmetkerleri.
Aımaqta myńnan astam medısına qyzmetkeri indetke qarsy kúres júrgizip jatyr. Olarǵa 2 mlrd teńgeniń ústinde qosymsha ótemaqy tólendi.
Qazir óńirdiń densaýlyq saqtaý salasyn mamandarmen qamtý jumysy jalǵasýda. 2019 jyly Qostanaı oblysyna 265 dáriger kelse, bıyl densaýlyq saqtaý salasyna barlyǵy 227 maman shaqyrtylyp otyr. О́ńirge kelgen dárigerlerge kóterme aqy tólenip, baspana berilýde, - dedi aımaq basshysy.
«Qurmet» ordenin omyraýyna taqqan oblystyq jedel járdem stansasynyń bas dárigeri Irına Shteıgervald Prezıdent Qasym-Jomart Toqaevqa shynaıy alǵysyn arnady.
- Eń aldymen Memleket basshysyna dárigerlerge qamqorlyq pen qoldaý kórsetip jatqany úshin rızashylyq bildiremin. Meniń jumysymdy joǵary baǵalaǵandaryńyz úshin shyn júrekten qýanyp turmyn. Pandemııa medısına qyzmetkerlerin jumyla jumys isteýge úıretti. Pandemııa bizdiń árqaısymyzdy árbir naýqasqa erekshe nazar aýdara bilýge úıretti. Eń bastysy biz kóp bolyp komandamen jumys isteýge úırendik. Men búgin joǵary memlekettik nagradalarmen marapattalǵan árbir medısına qyzmetkerin maqtan etemin, - dedi orden ıesi.
