Ejelden astyqty óńir sanatyndaǵy Zerendi aýdanynyń agrarshylary ústimizdegi jyldyń birinshi jarty jyldyǵyn aýyz toltyryp aıtýǵa laıyqty táp-táýir tabystarmen qorytyndylap otyr. Aýyl sharýashylyǵy óniminiń jalpy kólemi 9,5 mıllıard teńgeni qurap, ótken jyldyń sáıkes merzimimen salystyrǵanda 106,5 paıyzdyq ósimge qol jetkizdi. Jaman tumaýmen jaǵalasa júrip el ıgiligine osynsha úles qosý jap-jaqsy tabys deýge ábden bolady.
–Kóktemgi egis kezinde kóńil kúpti edi. Úmit pen kúdik arbasyp turǵan. Alaıda, dıqandar qaýymy mańyzdy naýqanda uıymshyldyq tanytyp, aýyl sharýashylyǵy daqyldaryn egýdi der shaǵynda júrgizdi. Dıqandar memleket tarapynan jasalǵan kómek-qoldaýǵa rızashylyǵyn bildirýde. Osynyń arqasynda, 247,9 myń gektardan astam alqapqa jazdyq dándi daqyldar sebildi. Buǵan qosa, dándi jáne burshaqty daqyldar 177,4 myń gektar alqapta ornalastyrylyp, ótken jyldyń kórsetkishi artyǵymen oryndaldy. Qazirgi kúni ekpe shópter, kartop, kókónis daqyldarynyń túsimi kóńildegideı,–deıdi aýdandyq aýyl sharýashylyǵy bóliminiń basshysy Serik Sabyrov.
Shyndyǵynda, bıylǵy egin oraǵynyń alǵashqy aınalymdary bitik ónimniń berik negizi qalanǵanyn aıqyndaıdy. Qolymyzdaǵy sońǵy derekterge súıensek, aýdannyń tańdaýly toǵyz sharýashylyǵy ázirge kósh bastap turǵynyn baıqaımyz. Máselen, Kúsep aýylyndaǵy S.Aıtqojın basqaratyn «Dıhan Plıýs» jaýapkershiligi shekteýli seriktestigi 21562 gektar egistikke shalǵy salyp úlgergen. Olar 6723 gektar dándi jáne 2981 gektar maıly daqyldaryn bastyryp, birinshi orynda keledi. Munda gektarynan 12,5 sentnerden altyn dán, 6 sentnerden burshaq jınalýda. Sondaı-aq, «Vıktorovskıı» JShS 179 gektar arpa daqylynyń ár aınalymnan 26,2 sentnerlik úzdik kórsetkishke jetip otyr. Al, S.Erohın basqaratyn «Aqjol-2011» seriktestigi gektar túsimdiligin 18,7 sentner, Iý.Golımbovskııdiń jetekshiligindegi «Agro 2004» JShS 17,8 sentnerden aınaldyrýda. Bul eki sharýashylyq ta Bulaq aýyldyq okrýginiń aýmaǵynda ornalasqan.
Árıne, bul kórsetkishter naýqan barysynda jaqsy qyrymen ózgerip otyratyny belgili. Soǵan qaramastan, N.Ysqaqov basqaratyn «Qaraózek», A.Elmaǵanovtyń jetekshiligindegi «Umaı Jer», S.Qojaǵulovtyń «Alıans Agro Investi» qajyrly eńbektiń eseli qaıtarymyna ıe bolatyndyǵy kórinip qaldy.
Aýdan eginshileri kelesi jyldyń molshylyǵyn qamtamasyz etý jumystaryn da sabaqtastyra júrgizýde. Olar qazirdiń ózinde 44,3 myń gektar alqaptaǵy súdiger jerlerdi óńdep, 175 myń gektar aýmaqtaǵy aramshópterge, zııankester men aýrýlarǵa qarsy qorǵaý is-sharalaryn ýaqtyly aıaqtady.
Oblystaǵy astyqty óńirler – Jarqaıyń, Jaqsy jáne Atbasar aýdandarynyń dıqandary egindi iriktep orýdy bastasa, ózge óńirlerdegi sharýashylyqtar eginniń pisýine qaraı daıyndyq jumystaryn shırata túsýde. Oblystyq aýyl sharýashylyǵy basqarmasynyń málimetine qaraǵanda, dıqan qaýym bul naýqanǵa tyńǵylyqty daıyndyqpen kelip otyr. Jańa astyqty jınaýǵa kómek kórsetilip, sharýalarǵa arzandatylǵan janar-jaǵar maı berildi. Budan bólek, memleket tarapynan dándi daqyldarmen aınalysyp jatqan sharýashylyqtarǵa 70 mıllıard teńgege shamasynda sýbsıdııa bólindi. Endigi mindet osy naýqandy uıymshylyqpen ótkizý.
Naýqan jańa ǵana bastalǵanymen, oblysta 52,3 myń gektardyń egini orylyp, 40,6 myń gektary bastyryldy. Ár gektardan orta eseppen 9,4 sentnerden astyq jınalýda. Bulandy aýdanynda gektar berekesi 14,1 sentnerden aınalýda. Bıylǵy jyldyń aýa raıyna qaraǵanda, táp-táýir kórsetkish.
Sóz sońynda aqyq dán aıalaǵan aqmolalyq dıqandar 4446,7 myń gektar alqaptaǵy dándi jáne burshaqty daqyldardy, 254 myń gektar alqaptaǵy maıly daqyldardy jınap alý úshin aıanbaı arpalysyp jatqandyǵyn aıtqymyz keledi.
Aqmola oblysy
Qazaqstandaǵy jáne álemdegi sońǵy jańalyqtardy birinshi bolyp oqý úshin Telegram jelisinde bizge jazylyńyz.
