Maratbaı О́skenbaıulynyń da ańshylyq ónerdi janyna serik etkenine kóp jyldar bolypty. Alǵash qyzyǵýshylyǵy on jasynan bastalǵan Maratbaı aǵamyzdyń ákesi О́skenbaı qumaı tazy baptap, onysyn urpaǵyna úıretipti. Jaqynda ańshy M.Talasbaev Baızaq aýdandyq tarıhı-ólketaný mýzeıine arnaıy at basyn buryp, baǵzydan kele jatqan rýhanı mura – ańshylyq jaıly oıymen bólisti.
– Kóshpeli qazaqtyń bar ómiri attyń jalynda, túıeniń qomynda ótkendikten janyna serik bolar ıt ertýi túsinikti árıne. Onyń ústine, júırik jylqy, ushqyr tazy, qyran qus jigittiń kórki emes pe? Qansha jerden órkenıet órlep, zaman ózgerdi degenimizben, qansonarda júırik atqa minip, ıt ertip, ańshylyqqa shyqqanǵa ne jetsin! Alaıda ańshy ekenmin dep jón-josyqsyz túz taǵylaryn qyra berýge de bolmas. Ań aýlaıtyn ózindik mezgilder de bolady. Saıatshylyqqa ásirese – kúzdiń aıaǵy, qys aılarynda shyqqan durys.
Meniń ańshylyqpen aınasylyp kele jatqanyma 40 jyldan asyp ketipti. «It jaqsysy – tazy» demekshi, búginde 7 tazy asyrap-baǵyp, solarmen aýyldyń tóńireginde ańshylyq quramyn. Tazylarymnyń on aılyq kúshiginiń ózi qasqyr alýǵa jarap qaldy. Budan bólek shıbóri, túlki, borsyq ustaǵan kezderimiz boldy. Osydan biraz jyl buryn halyq qalaýlysy Bekbolat Tileýhanmen ańshylyqqa shyqqanymyz bar. Bul men úshin úlken maqtanysh. Keıde balalaryma ańshylyq kezindegi qyzyqtar týraly aıtyp berip otyramyn. Balalar demekshi, búginde meniń uldarym da osynaý ata dástúrge aıryqsha qyzyǵýshylyqpen qaraıdy. Árıne qazirgi tańda halqymyzdyń turmys salty ózgerdi, burynǵydaı ańshylyqqa shyǵatyndar neken-saıaq. Desek te, babadan jetken baıyrǵy daǵdymyzdan aıyrylyp qalsaq, keıingi urpaqqa neni úlgi etemiz? Osyny oılaýymyz kerek. О́ıtkeni ótkendi óshirýge bolmaıdy, – deıdi bizben bolǵan áńgimesinde ańshy aǵamyz.
Iá, osy rette aıta keterligi halqymyzdyń boıyna sińgen tekti ónerdi úzbeı, órge súırep kele jatqan Maratbaı О́skenbaıuly murajaıǵa syıkáde jasaýdy da umytpady. Ańshylyq dástúrdi jandandyryp júrgen aǵamyz «Mýzeıge syı» aksııasy aıasynda borsyq pen túlkiniń terisin murajaıǵa tartý etti.
Aıdana ShOTBASOVA,
Baızaq aýdandyq tarıhı-ólketaný mýzeıiniń qor saqtaýshysy
