Buǵan deıin habarlanǵandaı, bıyl shilde aıynyń sońynda A.Balaeva «Egemen Qazaqstan» gazetiniń dırektorlar keńesine jáne «Qazmedıa ortalyǵy» baqylaýshylar keńesiniń quramyna engen bolatyn. Osyǵan qatysty mınıstr «Ár qosymsha júktemeniń óz jaýapkershiligi bary anyq. Aqparat mınıstrligin basqaryp otyrǵannan keıin elimizdegi eń bedeldi medıa qurylymdardyń ishindegi prosesterdi qadaǵalap otyrý kerek. «Egemen Qazaqstan» – 100 jyldyq tarıhy bar basylym. Búgingi tańda 185 myń oqyrmandy qamtyp otyr. Elde bolyp jatqan tynys-tirshiliktiń barlyǵyn osy «Egemen Qazaqstan» men «Kazahstanskaıa pravda» gazetteri arqyly bilýge bolady. «Qazmedıa ortalyǵy» – 10-nan astam iri BAQ redaksııasy shoǵyrlanǵan úlken ortalyq. Osy eki uıymdaǵy ishki prosesterdiń barlyǵyn der kezinde kórip otyrý, sheshim qabyldaý, kókeıkesti máseleler bolsa, ony birge sheship otyrý úshin osyndaı sheshim qabyldandy. Meniń oıymsha, bul – dástúrli dúnıe», dedi.
Aqparat jáne qoǵamdyq damý mınıstri sondaı-aq jańa maýsymnan bastap sheteldik oıyn-saýyq kontent pen serıaldardy satyp alý 30 paıyzǵa qysqaratynyn sóz etti. «Telearnalar jumysyna qatysty syndarly, oryndy syn men usynys kóp boldy. Olardyń barlyǵyn eskerip, telearnalar baǵdarlamasyn qaıta qarap shyqtyq. Oıyn-saýyq baǵdarlamalary men telehıkaıalardyń shamadan tys ekeni aıtyldy. Jańa maýsymnan bastap sheteldik oıyn-saýyq kontenti men serıaldardy satyp alýdy 30 paıyzǵa qysqartamyz degen sheshimge keldik. Bul serıaldar múlde bolmaıdy degen sóz emes. Iаǵnı bul baǵytty qoldaıtyn aýdıtorııanyń da múddesi eskeriledi. Elimizdiń áleýmettik-ekonomıkalyq jaıynan habar beretin tól baǵdarlamalarymyz daıyndalady. Ásirese, memlekettik uıymdardyń jumysy men memlekettik baǵdarlamalardyń oryndalýyn túsindirýge basymdyq beriledi», deı kele mınıstr «Ál-Farabı» arnasy iske qosylmaıtynyn habarlady.
Baǵdarlama barysynda A.Balaeva Kazakh TV arnasynyń aty ózgertilýi múmkin ekenin jetkizdi. «Elarna» telearnasy mádenıet jáne bilim salasyna qatysty aqparat tarata bastaıtynyn málimdedi. Sonymen birge «Qazirgi ekonomıkalyq jaǵdaıǵa baılanysty qolda bar resýrsty barynsha qoldaný kerek degen sheshim qabyldandy», dedi mınıstr.
Oǵan qosa Aqparattyq-taldaý ortalyǵy janynan eki telearnanyń kontent sapasyn baqylaýǵa arnalǵan arnaıy bólim ashylatyny málim boldy. Qurylym ónim sapasyn, mazmuny men júrgizýshilerdiń sóıleý mánerin, aýdarmanyń dáldigin qadaǵala-
maq.
