«Energetıka mınıstri Zýhaır Harbotlıdiń sózine súıensek, Damask mańyndaǵy jarylys saldarynan búkil el aımaǵynda elektr qýaty sónip qalǵan. Al munaı mınıstri Álı Ganem jarylǵan gaz qubyry úsh elektr stansasyn kógildir otynmen qamtamasyz etip otyrǵanyn habarlady.
Bılik ókilderi jaryq júıesi qaıta qalpyna keltirilgenin aıtyp otyr. Jarylys Arab gaz qubyry jelisiniń boıynda, Ad-Dýmaır jáne Adra qalasynyń ortasynda bolǵan», dep habarlaıdy Reuters agenttigi.
AQSh-tyń Sırııadaǵy arnaıy ókili Djeıms Djefreı keıingi ýaqytta DAISh sodyrlary qaıtadan kúsheıe bastaǵanyn aıtyp, dabyl qaǵyp otyr. Onyń sózine qaraǵanda, qazirgi tańda terrorıster eldiń ońtústik-shyǵys aımaǵynda kóbeıip barady.
«Jarylystyń saldaryn zerttep jatyrmyz. Biraq shabýyldy DAISh terrorshylary uıymdastyrǵany anyq», deıdi D.Djefreı.
Jarylys bolǵan Arab gaz qubyry Egıpetten bastalyp, Iordanııa men Sırııa aýmaǵynan ótedi. Oqıǵadan keıin jergilikti arnalar otqa oranǵan gaz qubyrynyń vıdeosyn jarııalaǵan. Reuters agenttiginiń málimetinshe, Damaskide jaryq kóp uzamaı qaıta janǵan. Jalpy, Sırııa birinshi ret jaryqsyz qalyp otyrǵan joq. Buǵan deıin 2013 jyly sodyrlar gaz qubyryn zaqymdap, biraz ýaqyt turǵyndar elektr energııasynsyz qalǵan edi.
