Eriktiler qaladaǵy az qamtylǵan, kópbalaly otbasylardan shyqqan oqýshylardyń oqý úlgerimine kómektesedi. Joba Nur-Sultan qalalyq jastar saıasaty máseleleri basqarmasynyń uıymdastyrýymen qolǵa alyndy. Atalmysh bastama eriktiler jyly aıasynda «Birgemiz: Bilim» jalpyulttyq jobasy negizinde júzege asýda.
Jalpy eriktiler 7 baǵyt boıynsha jumys isteıdi. Onyń ishinde «Birgemiz: Bilim» jobasy boıynsha qaladaǵy oqýshylardy, ásirese joǵarǵy synyp oqýshylaryn emtıhanǵa, UBT-ǵa, kóptegen olımpıadalyq saıystarǵa daıyndaýǵa kómektesedi.
Bilikti mamandar erikti qyzmetinde óz bilimi men tájirıbesin oqýshylarǵa úıretedi. Olar qazaq tili, aǵylshyn, ınformatıka, fızıka jáne t.b. pánder boıynsha repetıtor bolady. Kúnine 1-2 saǵat ýaqyt bólip, bir pán boıynsha bir aı oqytyp, daıyndaıdy. Iаǵnı, bir adamǵa 30 saǵattan kem emes ýaqyt jumsalady.
«Qaladaǵy az qamtylǵan, kópbalaly otbasylardan shyqqan oqýshylardy iriktep alýǵa tyrysamyz. Tizimdi Nur-Sultan qalalyq Bilim basqarmasymen birlese otyryp ázirleımiz. Áleýmettik jaǵdaıy tómen otbasyn izdep, monıtorıng jasap, iriktep alamyz. Biz tek olardyń oqý úlgeriminiń jaqsy bolýyn qadaǵalap qana qoımaı, sonymen qatar 100 shaqty oqýshyny mektepke qajetti qural-jabdyqtarmen de qamtýdy josparlap otyrmyz», – deıdi Nur-Sultan qalalyq jastar saıasaty máseleleri basqarmasynyń bólim basshysy Aqulan Tastemir.
Atalmysh bastama karantın jaǵdaıynda onlaın-formatta ótedi. ZOOM, Skype, Whats App, t.b. áleýmettik jelilerdi paıdalana otyryp, tálimdik-repetıtorlyq jumystar júrgiziledi.
Qazaqstandaǵy jáne álemdegi sońǵy jańalyqtardy birinshi bolyp oqý úshin Telegram jelisinde bizge jazylyńyz.
