Almaty qalalyq ishki ister departamentiniń bastyǵy almasty. Buǵan deıin departamentti basqaryp kelgen Qaırat Tynybekov ketip, ornyna Serik Kúdebaev taǵaıyndaldy. Bul týraly BNews.kz tilshisi Sergeı Kýıanov habarlady.
«Men Almaty qalalyq ishki ister departamenti bastyǵynyń almasqanyn aldyn ala rastaımyn. Al búgin keshke jańa keletin adamdy ákelip otyrǵyzady dep kútilýde. Tek Tynybekovtiń ornyna keletin adamnyń óz isin, qalany jáne óz jumysynyń uńǵyl-shuńǵylyn biletin adam ekenin aıta alamyn», - depti S.Kýıanov. Biraq basshynyń kim ekenin ashyp aıtpapty.
Alaıda, arada kóp ótpeı-aq ońtústik astananyń polısııa ujymyn basqaratyn kadrdyń aty-jóni buqaralyq aqparat quraldaryna tarap ketti. Ol buǵan deıin Almaty oblysynyń ishki ister departamentin basqarǵan Serik Kúdebaev bolyp shyqty. Al soǵan deıin Almaty qalalyq ishki ister departamenti bastyǵynyń jedel jumystar jónindegi orynbasary bolyp istegen eken. Jumysyn Jambyl aýdany ishki ister bóliminde jedel ýákil bolyp bastaǵan.
Qurysh Nurymbet.
