Qytaıdyń Hinhuanet agenttigi Qazaqstan Prezıdenti Qazaqstan halqyna ekinshi Joldaýyn arnaǵanyn habarlaı kele, Memleket basshysynyń daǵdarystan keıingi damý strategııasyna toqtalǵan. Agenttiktiń habarlaýynsha, Prezıdent koronavırýs pandemııasymen kúres sharalaryn jarııalap, eldiń damýyna qatysty birqatar tapsyrma bergen.
Memleket basshysynyń Qazaqstan halqyna Joldaýy japonııalyq basylymdardyń da nazarynda boldy. Nikkei Asian Review bıylǵy Joldaýdaǵy ekonomıkany qaıta qalpyna keltirý jónindegi usynystarǵa toqtalyp ótken. Agenttik koronavırýs pandemııasynyń el ekonomıkasyna úlken ózgeris ákelip, halyqtyń áleýmettik jaǵdaıyna tıgizgen áseri týraly da jazǵan. Osy oraıda Prezıdenttiń memleket tarapynan áleýmettik saladaǵy jáne ekonomıkany qoldaýǵa baǵyttalǵan barlyq mindettemeler oryndalady degen sózin jarııalady. Sheteldik basylym osy maqsatta Ulttyq qordan 1 trıllıon teńge bólinetinin atap kórsetken.
The Times of Central Asia halyqaralyq agenttigi Joldaýda aıtylǵan otbasy, balalar quqyǵy, pedofılııa máselelerine nazar aýdarǵan. «Qasym-Jomart Toqaev balalardyń qaýipsizdigi men quqyǵyn qorǵaý máselesine erekshe nazar aýdarý kerektigine toqtaldy.
Ortalyq Azııadan jańalyq taratatyn agenttik: «El Prezıdentiniń aıtýynsha, kámelettik jasqa tolmaǵan balalarǵa qatysty jynystyq sıpattaǵy áreketteri úshin qylmystyq jaza edáýir qatańdatylǵan. Degenmen Prezıdent bul máseleniń áli de tolyqtaı sheshilmegenin sóz etti. «Mundaı qylmyskerler raqymshylyq alý jáne merziminen erte bosaý quqyǵynan aıyrylyp, meılinshe qatań jazalanýy kerek. Olardy qaýipsizdigi barynsha joǵary túzeý mekemelerinde oqshaýlaǵan jón», deıdi Qazaqstan Prezıdenti.
Sonymen birge osy tektes árbir isti prokýratýra organdary erekshe baqylaýǵa alýy tıis. Áleýmettik jáne quqyq qorǵaý organdarynyń áreketsizdigi nemese salǵyrttyǵyna baılanysty qatań jaza qoldanylatyn bolady. Joldaýda Qazaqstanǵa áleýmettik saıasattyń jańa paradıgmasy kerek ekeni aıtylǵan», dep jazdy.
Kanadanyń The National Post gazeti elimizde mán-mańyzy joǵary jańa Joldaý jarııalanǵanyn habarlaı kele, Qazaqstannyń aldynda turǵan asa mańyzdy mindet – ónerkásiptik áleýetti tolyq paıdalaný dep qorytady.
«Qazaqstan Prezıdenti ishki naryqtyń zor múmkindikterin áli de bolsa tolyqqandy júzege asyra almaı jatqanyn eskertti. Onyń aıtýynsha, óńdelgen taýarlardyń úshten ekisine jýyǵy shetelden ákelinedi.
Ulttyq ekonomıkanyń strategııalyq qýatyn arttyrý úshin tez arada qaıta óńdeý isiniń jańa salalaryn damytý qajettiligi ortaǵa salyndy. Ásirese qara jáne tústi metallýrgııa, munaı hımııasy, kólik qurastyrý jáne mashına jasaý, qurylys materıaldary men azyq-túlik óndirý jáne basqa da salalarǵa kúsh salý keregi aıtyldy. Qasym-Jomart Toqaev sapalyq turǵydan múlde jańa ulttyq ındýstrııany damytý úshin jańǵyrtylǵan zańnamalyq negizdiń qajettiligin basa aıtty», delingen gazet maqalasynda.
Bolgarııalyq The Bulgarian News Agency basylymy da Qasym-Jomart Toqaevtyń bıylǵy Joldaýynyń basym baǵyttary týraly arnaıy habar daıyndady. Onda sapaly bilim berý júıesiniń qajettigi men jastar máselesi qozǵalǵany týraly jazylǵan. Agenttik Prezıdenttiń qazirgi jastardyń áp-sátte baıýǵa nıetti ekenin, sol maqsatta qumar oıyndar men aqsha tigýge áýestigi beleń alyp bara jatqany týraly pikirine nazar aýdarǵan. «Qazaqstan Prezıdenti jastar arasynda gastarbaıterler týraly orynsyz qaljyń aıtý jáne olardyń eńbegin mensinbeýshilik bar ekenin eske saldy. Osy rette Prezıdent ár eńbektiń, árbir qyzmetkerdiń memleket úshin mańyzdy ekenin, qazirgi jaǵdaıda basqasyn aıtpaǵanda, kishi medısına qyzmetkerleri, kommýnaldyq jáne qyzmet kórsetý salasynda eńbek etetin azamattar qyrýar jumys atqarǵanyn aıtty. Sonymen birge olardyń memleket nazarynan tys qalmaıtyny habarlandy», dep jazdy sheteldik agenttik.
Baýyrlas Túrkııanyń da birqatar basylymy Joldaý jóninde jazdy. Máselen, Rize gazete Joldaýda kórsetilgendeı, bilim berý salasyndaǵy ózgeristerge toqtalǵan. Naqty aıtar bolsaq, Túrkııalyq gazet 2021 jyldyń qańtar aıynan bastap muǵalimderdiń eńbekaqysy 25 paıyzǵa kóbeıtý jóninde sheshim qabyldanǵanyn habarlady. Osy rette atalǵan gazet Prezıdenttiń «Jalaqy mólsheri aldaǵy ýaqytta da arta beredi. Bul maqsatqa aldaǵy úsh jylda qosymsha 1,2 trıllıon teńge bólinedi. Biz balalardyń mektepke deıingi jan-jaqty damý máselesin sheshýimiz kerek. 2025 jylǵa qaraı 6 jasqa deıingi balalardy mektepke deıingi tárbıemen jáne oqytýmen 100 paıyz qamtamasyz etýdi mindetteımin» degen tapsyrmasyna ekpin bergen.
