Taıaýda úsh tennısshige Qostanaıdaǵy «Iýbıleınyı» shaǵyn aýdanynan bir bólmeli páterdiń kiltteri tabys etildi. «Qoǵamdyq kelisim» úıinde ótken saltanatty sharaǵa deneshynyqtyrý jáne sport basqarmasynyń basshysy Azamat Begalın qatysyp, paralımpıadashylardyń aımaq sportynyń damýyna úlken úles qosqanyn atap ótti.
Tennısshilerdiń bapkeri Serik Danııarov oblys ákiminiń alǵys hatyn aldy. Bapker 20 jyldan beri Qostanaıdaǵy estý qabileti nashar balalarǵa arnalǵan mektep-ınternattyń órenderin sportqa baýlyp keledi.
– Estý qabileti tómen sportshylarǵa arnalǵan sýrdlımpıada oıyndary tuńǵysh ret 1924 jyly Parıj qalasynda ótti. О́zi 4 jylda bir ret uıymdastyrylady. Oǵan 100-ge jýyq memlekettiń sportshylary qatysady. Túrkııada ótken dúbirli dodada shákirtterimniń baǵy janyp, qola júldege taban tiredi. Endi, mine, búgin taǵy qýanyshqa kenelip jatyrmyz. Úsh sportshymyz da baspanaly boldy. Qalanyń eń jańa shaǵyn aýdanynan páter berip jatqan oblys basshylaryna alǵysymyz sheksiz. Bul qurmetke shákirtterim de ábden laıyq dep oılaımyn. Úsheýi de qarapaıym, eńbekqor jigitter. Mysaly, Danııar Eskendirov kishkentaı kezinen osy estý qabileti nashar balalarǵa arnalǵan mektep-ınternatta oqydy. Qazir osy mektepte aýla sypyrýshy bolyp jumys istep júr. Álemdik jarystarda el baıraǵyn jelbiretip júldeli oryndardan kórinip júrse de, qol eńbegin qorash sanaǵan emes, – dedi bilikti bapker.
Úsh sportshyny oblys ákimi Arhımed Muhambetov áleýmettik jeli arqyly quttyqtady.
«Sportshylarymyzdy jańa baspanamen quttyqtaımyn! Jańa páterlerde jaılylyq, jylýlyq jáne sporttyq jetistikter tileımin!», dep jazdy oblys basshysy «Instagram» paraqshasynda.
Samsýn sýrdlımpıadasyna estý qabileti nashar úsh myńǵa jýyq sportshy qatysty. Al Qazaqstannan 9 sport túri boıynsha 50-ge jýyq sportshy barǵan. Olar erkin jáne grek-rım kúresi, sambo, jeńil atletıka, júzý, taekvondo, ústel tennısi boıynsha synǵa túsip, otandyq sýrdsport tarıhyndaǵy eń úzdik kórsetkishke qol jetkizgen.
Qostanaı oblysy
