Áskerı qyzmetshi 2 qyrkúıek kúni saǵat 7.00-de áskerı polısııa bóliminiń baqylaý-ótkizý pýnktinen marafondy bastady. Jospar boıynsha ony 4 qyrkúıekte týǵan ólkesi Jańaarqa aýdanynda aıaqtaıdy.
Ofıser marafon júgirisin Qaraǵandy garnızonyndaǵy áskerı polısııa bóliminiń qurylǵanyna 23 jyl tolýyna arnaıdy.
Zańǵar Álkenov qazaq kúresinen QR sport sheberi jáne dzıýdo men sambodan sport sheberine úmitker. Buǵan deıin ol elimizdiń qurama komandasynda bolǵan. Biraq alǵan jaraqaty men júrgizilgen operasııadan keıin kúrestegi kásibı mansabyn aıaqtap, besinshi jyl qatarynan Armııa ortalyq sport klýbynyń sportshylaryn jattyqtyrýda. Birneshe jyldan beri kóp shaqyrymdyq marafondarǵa qatysyp keledi, onyń eń uzyn qashyqtyǵy 130 shaqyrymdy quraǵan.
«200 shaqyrymdyq marafon meniń múmkindikterimniń beriktigin tekseredi», – deıdi áskerı qyzmetshi.
Júgiris navıgasııalyq platformamen baqylanyp turady. Onlaın rejıminde ýltra marafondaǵy júgirýshiniń baǵyty men ýaqytyn baqylaýǵa bolady.
