Mamandardyń esepteýine qaraǵanda, 17 myń gektar egistik alqaptary zııan shekken. Áıtse de, qalǵan jerden tolymdy ónim alsaq degen úmit bar.
–Gektar berekesi 10 sentnerden aınalady dep boljap otyrmyz,–deıdi aýdandyq kásipkerlik jáne aýyl sharýashylyǵy bóliminiń bas mamany Murat Berlibekov,–bıdaıdyń ylǵaldylyǵy 20 prosent shamasynda. Osy aptada aýa raıy birshama turaqty boldy. Ylǵaldylyq ta 13 prosentke deıin tústi.
Bir aıta keterligi, Jarqaıyń aýdanynyń alqaptaryndaǵy astyqtyń qamyrlylyǵy joǵary. Sol sebepti ózge óńirlerge qaraǵanda, bıdaıy qymbat bolady. Eńbektiń esesi qaıtatyn jer de osy.
Búgingi tańda 885 astyq kombaıny aýa raıynyń árbir ashyq sátin paıdalanyp, tynymsyz eńbek etýde. Kúzgi dala jumystaryna 9750 tonna kepildendirilgen janar-jaǵar maı bólingen. Aýdanda syıymdylyǵy 428 myń tonna bolatyn 7 iri astyq qabyldaý orny bar. Bastyrylǵan dán úzdiksiz jetkizilýde. Kún raıy durys bolsa, Jarqaıyńnyń jansebil dıqandary kúzgi egin oraǵyn eki aptada eńseremiz dep otyr.
Aqmola oblysy,
Jarqaıyń aýdany
