Bul týraly óńirlik kommýnıkasııalar qyzmetinde ótken baspasóz konferensııasynda Pavlodar oblystyq orman sharýashylyǵy jáne janýarlar dúnıesi aýmaqtyq ınspeksııasynyń basshysy Rýslan Týlepbaev málim etti.
"Sútqorektilerdiń 10 túri men qustardyń segiz túri aýlaý obektileri bolyp tabylady. Bul - qaban, elik, qasqyr, qoıan, túlki, qarsaq, dala sasyqkúzeni, borsyq, sýyr, sý tyshqany, úırek, qaz, qasqaldaq, shil, qur, bódene, kógershin, shalshyqshy. Ańshy joldamada nemese ruqsat berilgen qujatta kórsetilgen janýarlardyń sany qansha bolsa, sonsha aýlaýǵa quqyly. 2020 jyldyń qorytyndysy oblystyń jabaıy janýarlar sany ulǵaıǵanyn kórsetti. Ań aýlaý erejelerine sáıkes áýesqoı sporttyq ań aýlaý úshin tıisti qujattar bolý kerek. Ańshy kýáligi, janýarlar dúnıesin paıdalanýǵa berilgen ruqsatnama, ańshylyq sharýashylyǵy sýbektisiniń joldamasy, jeke tulaǵalar úshin qarý men oqtardy saqtaýǵa jáne alyp júrýge ruqsatnama, jyrtqysh qustardy aýlaý kezinde tólqujat bolǵanda ǵana ruqsat beriledi", - deıdi Rýslan Týlepbaev.
Inspeksııa basshysynyń aıtýynsha, ótken jyly ań aýlaý erejeleriniń talaptaryn buzǵan 491 adam anyqtalyp, ákimshilik jaýapkershilikke tartylǵan. Onyń ishinde ań aýlaý erejelerin buzǵany úshin 42 adamǵa 7 mln teńgeden astam aıyppul salynyp, 3 mln teńge óndirilgen.
"Janýarlar dúnıesin paıdalaný talaptaryn jáne ań aýlaý erejelerin buzý anyqtalǵan jaǵdaıda azamattar QR ÁQBtK-niń 382-baby boıynsha ákimshilik jaýapkershilikke tartylady. Mundaı jaǵdaıda eskertý nemese jeke tulǵalarǵa 5 AEK (13890 teńge), kásipkerlik sýbektilerine 25-ten (69 450 teńge) 100 (277 800 teńge) AEK-ke deıin aıyppul salynady", - deıdi Rýslan Týlepbaev.
