Jýrnalıstermen júzdesken «Social Project Management» ortalyǵy qoǵamdyq uıymynyń múshesi Erlan Táńirbergenov pen Aýǵan ardagerlerin úılestirý keńesiniń múshesi Maqsat Mamadııarov referendýmnyń ótý barysy týraly málimetpen bólisti.
Brıfıngke qatysýshylar Almaty turǵyndarynyń el ómirindegi mańyzdy saıası oqıǵaǵa belsendi úles qosyp jatqanyn atap ótti. Degenmen sarapshylardyń boljamynsha, daýys berýshilerdiń legi tústen keıin qarqyn almaq. Qala aýmaǵynda barlyǵy 1300-den astam táýelsiz baıqaýshy referendýmnyń ár sátin qalt jibermeı qadaǵalap otyr. Sondaı-aq qalanyń barlyq aýdandarynan 80-ge tarta maman sońǵy aqparattardy jedel shtabqa joldap otyr.
Vaagn Ovakımıan: Qazaqstan halqynyń aýyzbirshiligine tánti boldym
Maqsat Mamadııarovtyń aıtýynsha, táýelsiz baqylaýshylar tańǵy saǵat 07:00-den bastap barlyq referendým ýchaskesinde jumysyn bastaǵan.
«Qazir bizdiń 1308 táýelsiz baqylaýshymyz ýchaskelerde jumys istep otyr. Sonymen qatar 654 kapıtan baqylaý prosesin úılestiredi. Budan bólek, mobıldi toptar da bar. Qazirgi ýaqytqa deıin qandaı da bir zańǵa tompaq áreket tirkelgen joq. Almaty turǵyndarynyń belsendiligi tańnan bastaldy. Bul bizdi qýantady. Daýys berý nátıjeleri men qatysý kórsetkishi týraly aqparatty keshke jarııalaımyz», dedi Maqsat Mamadııarov.
Spıkerler azamattardy arandatýshylyqtarǵa senbeýge shaqyryp, tek resmı jáne tekserilgen aqparat kózderine nazar aýdarýǵa keńes berdi.
«Biz barlyq ýchaskeni jiti baqylap otyrmyz. Qandaı da bir zańbuzýshylyq anyqtalǵan jaǵdaıda, bul týraly senimdi aqparat kózderi arqyly habarlaımyz. Referendým barysynda túrli áserli sátterge kýá boldyq. Máselen, búgin 18 jastaǵy almatylyq óz týǵan kúninde kelip, tarıhı tańdaýǵa ún qosty. Taǵy bir 101 jastaǵy ájeı referendýmǵa óz aıaǵymen kelip, elimizge baıandy baq tilep, bata berdi», deıdi Erjan Táńirbergenov.
