Túrkistan oblysyna arnaıy issaparmen kelgen Densaýlyq saqtaý mınıstri Alekseı Soı aýrýhana qurylysynda boldy. Sondaı-aq oblystyq qoǵamdyq densaýlyq basqarmasynyń basshysy Marat Pashımovpen Túrkistandaǵy birqatar emdeý mekemesin aralap, tynys-tirshiligimen tanysty. Qalalyq ortalyq emhanada bolyp, ondaǵy jumys barysyn baqylady. Emhana bir aýysymda 500 kelýshige laıyqtalǵan, 900 - den astam medısına qyzmetkeri jumys isteıdi. Koronavırýs ınfeksııasymen kúres maqsatynda 18 mobıldi top qurylǵan. Emhana bazasynda sondaı-aq, indetti anyqtaıtyn vırýsologııalyq zerthanasy bar. Osy kúnge deıin 40 myńǵa jýyq azamattan synama alynǵan. Emdeý mekemesi barlyq qajetti medısınalyq qural-jabdyqtarmen de tolyq qamtamasyz etilgen.
Jergilikti medısına qyzmetkerlerimen kezdesip, jaǵdaılarymen tanysqan mınıstr óńirdegi emdeý mekemeleriniń qyzmetin oń baǵalady. "Prezıdent halyqqa Joldaýynda alǵashqy medısınalyq kómekti damytýǵa asa mán berdi. Túrkistan oblysynda bul baǵytta aýqymdy jumystar atqarylýda. Túrkistan qalalyq emhana qyzmetkerleriniń koronavırýs ınfeksııasy beleń ala qalǵan jaǵdaıda ekinshi tolqynǵa daıyndyǵy joǵary deńgeıde ekendigin de baıqadyq. Emdeý mekemesi barlyq medısınalyq qajettiliktermen jáne jedel-járdem kólikterimen qamtamasyz etilgen", - dedi Alekseı Soı.
Oblysta tumaýǵa qarsy ekpe egýge daıyndyq jumystary júrgizilýde. Bul oraıda vaksınanyń birinshi partııasy jetkizilgen. Osy aıdyń 15-nen bastap egý jumystary bastalady. Densaýlyq saqtaý mınıstri sapar sońynda Túrkistan qalasynda jańadan boı kóterip jatqan modýldi juqpaly aýrýlar aýrýhanasynda da boldy. Emdeý mekemesi 200 tósek-orynǵa eseptelgen. Nysannyń qurylysy josparlanǵan aımaqta barlyq qajetti ınjenerlik jeliler men kólik ınfraqurylymy bar.
