Jergilikti turǵyndar onyń basyn kútip-tazalap, gúl egip otyratyn kórinedi. Onyń asqan erlikpen qaza tapqanyn da kózi kórgender aıtyp ketipti. Fashıster shoǵyrlanǵan ortaǵa ol jasyrynyp baryp, birneshe granata laqtyrǵan eken. О́zi de aýyr jaralanady. Hýtor turǵyndary ony jasyryp, bir úıde baǵady, biraq aýyr jaraqattan jaýynger qaıtys bolady.
Al kostel qyzmetkeriniń shirkeý kitabyndaǵy jazýyna qaraǵanda ol Soltústik Qazaqstan oblysynyń Oktıabr aýdanyndaǵy Baǵanaty aýylynyń týmasy. Esimin Kasse Sebero dep kórsetken. Bul Qasym Sıbırden (Sebero degen osy Sıbır degen sózge uqsaıdy ǵoı) nemese Soltústikten dep boljaýǵa negiz bolyp otyr. Rejısser Baǵanaty aýylynan soǵysqa attanǵandardyń arasynan 3-aq adam habarsyz ketkenin de anyqtap kelipti. «Demek, osylardyń bireýi Slovenııaǵa jerlengen batyr bolýy múmkin», deıdi rejısser.
Sergeı Ázimovtiń aıtyp bergen derekteri osyndaı. Ol muny Qazaqstan elshiliginiń qyzmetkerlerinen estipti. Qazaq soldatynyń zıraty sondaı jaqsy kútimde ekenin kórgen ol qatty tebirenip, derekti fılm túsirýdi qolǵa alǵany sol eken. Maqsaty – batyrdyń týǵan jerin túsirip, týystary, tanystary bolsa – áńgimelerin jazyp alǵysy kelgen.
Sóıtse mundaǵy jurtqa Kasse Seberonyń esimi osydan eki jyl buryn belgili bolǵan eken. Tipti Jambyl aýdanynan onyń týystary da tabylyp, habarsyz ketken bizdiń aǵamyz bolýy kerek degen boljamdar aıtylǵan. Olardyń aıtýyna qaraǵanda, batyrdyń aty-jóni Qasym Jaqypov. Kasse degendi olar Qasym dep qabyldaǵany haq.
Alaıda Oktıabr aýdanynda týǵan degen derekti alǵa tartýshylar onyń bul adam ekeni naqty emes deıdi. Sonyń ishinde oblystyq arhıvtiń dırektory Sáýle Málikovanyń aıtýyna qaraǵanda, qujatty negizde dáleldenbegen soń ony Qasym Jaqypov dep aıtý qıyn. Arhıv dırektorynyń ózi Baǵanaty aýylynan habarsyz ketkender 3 emes 10 ekenin anyqtaǵan. «Biz burynǵy Oktıabr, qazirgi Shal aqyn aýdanynyń áskerı komıssarıatyndaǵy barlyq qujattardy aqtaryp shyqqanbyz. Sol kezdegi Baǵanatyda 42 úı bolsa, sol jerden 48 adam áskerge shaqyrylypty. Aty-jónderin de atap berdi. Sonyń 10-y habarsyz ketken eken», dedi ol. Zerdeleý barysynda sonyń ishinde partızandar bolǵany anyqtalǵan. Sáýle Zeınollaqyzy olardyń kim ekenderin de atap berdi. Solardyń ishinde Jıansha Esimseıitov degen bir jaýynger Slovenııa mańyndaǵy partızan otrıadynda bolǵany anyqtalǵan. Kasse Sebero osy shyǵar dep júrse – ol Italııanyń Trıest qalasynyń mańynda jerlengen bolyp shyqty. Slovenııa men Italııanyń jeri japsarlas bolǵanymen bul jaýyngerdiń zıraty tabylǵannan keıin Kasse Seberonyń bul emes ekendigi anyqtalǵan.
Sóıtip Kasse Seberonyń týystary tabylmaı, rejısserdiń Qyzyljar óńirindegi joly bolyńqyramady.
Soltústik Qazaqstan oblysy
