Búgingi tańda oblys boıynsha 574 myń gektar sýarmaly alqap bar. Al, «Qazsýshar» RMK Túrkistan oblystyq bólimshesi onyń 313 myń gektaryn sýarmaly sýmen qamtyp otyr.
«Bıylǵy vegıtasııalyq kezeń sý tapshylyǵyna baılanysty kúrdeli boldy. Bizge jylda keletin sý mólsheri bıyl shamamen 30% az boldy. Osyǵan oraı ekologııa mınıstri Maǵzum Myrzaǵalıev, oblys ákimi О́mirzaq Shókeev birneshe márte kórshiles О́zbekstan eline baryp, kelissózder júrgizdi. Nátıjesinde transshekaralyq «Dostyq», «Hanym», «Achınaý» kanaldarynda sýdy ádiletti bólý týraly kelisim jasaldy. Aıta ketý kerek, О́zbekstan qıyn kezeńge qaramastan óz ýádesinde turyp, sýdy kelisim boıynsha jiberip otyrdy. Al, bizdiń Túrkistan oblystyq bólimshesi táýlik boıy jumys istep, sharýalardy barynsha sýmen qamtydy», dedi D. Konovalov.
«Qazsýshar» bólimshesi bastyǵynyń aıtýynsha, negizinen tik drenajdy uńǵymalary qazý, sorǵy beketterin ornatý jáne sý bógetterin salý arqyly óńir sharýalary sýmen qamtylǵan.
Sondaı-aq, bıyl óńirde kúrish daqylynyń kóp egilýine baılanysty (Jetisaı jáne Otyrar aýdandarynda 5 myń tonna) ózge dándi daqyldarǵa sý jetispeýshiligi baıqalǵan. Tyǵyryqtan shyǵý úshin bólimshe mamandary avtomatty sý bógetterin salyp, aımaqtaǵy barlyq egin alqaptaryn qurǵaqshylyqtan aman alyp qalǵan. Nátıjesinde maqta, kúrish, kókónister men jemister bitik shyqqan.
«Búgingi tańda óńirdegi sýarý naýqany 95% aıaqtaldy. Nátıje jaman emes. Qazir Syrdarııa ózeniniń saǵasy boıynsha aǵatyn sý mólsheri sekýndyna 42 tekshe metrdi quraıdy. Ol Shardara sý qoımasyna jınaqtalýda. Demek, sý jetkilikti dep aıtýǵa tolyq negiz bar», dedi ol.
Qazirgi tańda bólimshe sýarmaly júıelerdi qaıta jańǵyrtý boıynsha aýqymdy jumys júrgizýde. Máselen mundaı sharalardyń biri Túlkibas aýdanynda júzege asyrylýda.
«Qazir óńirdegi sýarý júıeleri shamamen 63% jumys istep tur. Sondyqtan biz birneshe baǵdarlama boıynsha jumys júrgizetin bolamyz. Barlyq kanaldar jerdi qazý arqyly tartylǵan. Ol birinshiden sýdyń sińip ketýine sebep bolsa, ekinshiden qum quramy da úgilgish bolyp keledi. Sondyqtan jylyna 1-2 márte arnalardy tazartyp otyramyz. Aldaǵy ýaqytta kezeń-kezeńimen arnalardy betondaımyz»,- dedi D. Konovalov.
«Qazsýshar» RMK Túrkistan oblystyq bólimshesi dırektorynyń orynbasary Serik Pirimqulovtyń sózinshe, óńirde 6 nysan qaıta jańǵyrtylýda. Túlkibas aýdanynda – 2 nysan jańartylyp jatyr. Onyń sheńberinde aýdandaǵy aýyldardyń birine baratyn 5 bóget jáne 13 magıstraldy kanal qaıta iske qosylmaq. Bul jumystarǵa 300 tehnıka jumyldyrylǵan.
«Bul kanalǵa úlken úmit artyp otyrmyz. Egin egýimiz úshin bizge birinshi kezekte sý kerek. Aýyl sharýashylyǵyna qajetti jem-shóptiń ósýi de osy sýǵa baılanysty. Aýyldyqtar arnanyń iske qosylatynyn estip qatty qýanyp jatyr. Atqarylyp jatqan jumystardy da kózben kórip otyrmyz»,- dedi Qarabulaq aýylynyń turǵyny Erjan Ábdihalyq aqsaqal.
