Máselen, qashanda qaıyrym jasaýdan qalys qalmaıtyn "Salıqaly urpaq" qoǵamdyq qory bul joly Jetisý balalaryna 500 noýtbýk syılady. "Salıqaly urpaq" qory buǵan deıin Almaty qalasynyń oqýshylaryna 500 noýtbýk tartý etken edi.
"Bul noýtbýkter az qamtylǵan otbasy balalaryna beriletin bolady. Biz osyndaı qıyn kezeńde árbir balanyń sapaly jáne jaqsy bilim alýyn qalaımyz. О́ıtkeni, bolashaq urpaqtyń damýyna esh kedergi bolmaýy kerek", - deıdi qor dırektory Qasym Qasabekov.
Jalpy, jańa oqý jylynda az qamtylǵan otbasylardyń balalaryna jaǵdaı jasaý maqsatynda uzyn sany 55 myńnan astam kompıýter tehnıkasy satyp alynady eken. О́tkende sol kompıýterlerdiń alǵashqy legi jetkizilgen bolatyn. Tehnıkalyq erekshelikke sáıkestigin muqııat tekserilgennen keıin, derbes kompıýterler Aqsý, Qaratal aýdandary men Taldyqorǵan qalasynyń oqýshylaryna berildi.
"Jańa oqý jylynda qashyqtan oqytý úshin jaǵdaı jasaý maqsatynda Almaty oblysynyń oqýshylaryn barlyq qajetti tehnıkamen qamtamasyz etý jumystary júrgizilýde. Jaqynda balalarǵa respýblıkalyq bıýdjet qarjysyna satyp alynǵan derbes kompıýterler taratylsa, bul "Salıqaly urpaq" qoǵamdyq qorynyń demeýshiliginiń arqasynda Taldyqorǵan qalasyna 500 noýtbýk jetkizildi. Olardyń eki júzi oblys ortalyǵynda turatyn oqýshylaryna arnalǵan, al qalǵandary jaqyn arada aýdandarǵa bólinedi", - deıdi oblystyq bilim basqarmasynyń basshysy Maıgúl Omarova.
Aıtpaqshy, Almaty oblysynda jyl sońyna deıin mektepterdiń 84 paıyzy symsyz ınternetke qol jetkizetin bolady. Bul maqsatqa jergilikti bıýdjetten 156 mektepke 454 mıllıon teńge bólindi. Nátıjesinde jyl sońyna deıin 639 mektep Wi-Fi tehnologııasy negizinde ǵalamtormen qamtylatyn bolady. Jalpy, búginde oblystaǵy 760 mekteptiń barlyǵy kompıýterlik tehnıkamen jabdyqtalyp, 100 paıyz ǵalamtorǵa qosylǵan. Onyń 527 mektebi nemese 69,3 paıyzy joǵary jyldamdyqty ınternetke talshyqty-optıkalyq kabel arqyly jalǵansa, 233 mektep ıaǵnı, 30,6 paıyzy spýtnıktik baılanys arqyly ǵalamtor tutynyp otyr eken. Al Wi-Fi tehnologııasy negizinde symsyz ınternetke qosylǵan mektep sany 483 shamasynda.
Sondaı-aq, oblystyń bilim oshaqtaryndaǵy kompıýterlerdiń jalpy sany 50 myńnan asady eken. Onyń 40 myńǵa jýyǵy aýyl mektepterine tıesli kórinedi. Byltyr aqparattandyrý baǵdarlamasy boıynsha jumys tehnıkasyn satyp alýǵa 376,9 mıllıon teńge bólinse, bıyl muǵalimderge qajet kompıýter úshin 311,8 mıllıon teńge qarjy qarastyrylǵan. Munan bólek, oblystyń bilim berý mekemelerinde 69 IT-synyptar qurylǵan. Bıyldyń ózinde 50 IT synypty jabdyqtaý úshin 476,8 mıllıon teńge qarjy bólinip otyr.
