Aksııaǵa elordadaǵy barlyq 15 qalalyq emhanalar men medısınalyq kómektiń kepildendirilgen kóleminde jáne mindetti áleýmettik medısınalyq saqtandyrý sheńberinde kómek kórsetetin jeke medısınalyq uıymdar qatysady. Qalalyq densaýlyq saqtaý basqarmasy basshysynyń orynbasary Álııa Rústemova: "AMSK kórsetý uıymdaryna tirkeý naýqanyn bastadyq. Qyzmet kórsetýdiń aýmaqtyq prınsıpin eskerip, azamattarǵa medısınalyq kómek alý úshin turǵylyqty meken-jaıyńyzǵa jaqyn ornalasqan emhanalardy tańdaýǵa keńes beremiz", - dedi.
Nur-Sultan qalasynyń qoǵamdyq densaýlyq saqtaý basqarmasynyń bergen málimetine súıensek, búgingi kúnge deıin qaladaǵy AMSK uıymdaryna 1 mıllıon 181 myńnan astam adam tirkelip, medısınalyq kómek alyp kelgen eken.
Tulǵany AMSK uıymdaryna tirkeý ambýlatorııalyq deńgeıde medısınalyq kómek kórsetýdiń negizi bolyp tabylady jáne ol kelesi prınsıpter boıynsha júzege asyrylady: 1) aýmaqtyq qol jetimdilik; 2) AMSK uıymyn erkin tańdaý; 3) AMSK dárigerin (jalpy tájirıbe dárigeri, ýchaskelik terapevt, ýchaskelik pedıatr) erkin tańdaý; 4) otbasylyq qyzmet; 5) menshik formasyna jáne vedomstvolyq baǵynystylyǵyna qaramastan AMSK uıymdarynyń teńdigi men ádil básekelestigi. Al 18 jasqa tolmaǵan tulǵalardy onyń zańdy ókilderiniń bireýi tirketýge quqyly.
Azamattardy AMSK uıymdaryna tirkeý olardyń suranysy boıynsha "Elektrondyq úkimet" veb-portaly arqyly júzege asyrylady. Tirkeý kezeńinde qala turǵyny buǵan deıin tirkelgen uıymynan avtomatty túrde shyǵarylady. "Emhanaǵa óz erkimen tirkeý quqyǵynyń jylyna bir ret qana beriletinin eskertemiz", deıdi densaýlyq saqtaý basqarmasy.
