Qyzmet barysy týraly az-kem sóılesýge kelisken bolatynbyz. Jumysynyń jaı-japsaryn suramaq boldyq. Eńbegin de. О́mirlik maqsat-muratyn da. Áıtse de, qalalyq emhananyń medbıkesi Baıan Izmaılovanyń búginde ýaqyty tym tapshy bolyp shyqty. Aıtýyna qaraǵanda, eki birdeı qart adamnyń densaýlyǵyn tekserip, qarap shyǵýy kerek. Jasy úlken adamdar uzaq kútkendi unata bermeıdi. Sodan soń syrqattanyp qalǵan úsh balaǵa barmaq. Osylaı jalǵasa beretin syńaıly. Tilshige tabanynan taýsylyp eńbek etip júrgen jaıyn tis jaryp aıtýǵa yqylas bolǵanymen, ýaqyty jetpeıdi.
Keıipkerimiz qyzmet etetin emhananyń №226 ýchaskesinde 1800 adam tirkelgen eken. Adam kóp bolǵan soń aýrý da az emes. Onyń ústine jaman tumaý jan alqymnan alǵan sátte aıryqsha saq bolmasa taǵy bolmaıdy. Sondyqtan habar tıisimen alyp-ushyp jetedi. Beınebir pendeniń perishtesi ispetti.
– Aýrý azabyn arqalap, tósek tartyp jatqan jannyń kóńili kúızelýi de múmkin, – deıdi medbıke, – sol sátte em-domyń bylaı tursyn, bir aýyz jyly sózińniń ózi qýat beredi.
Syrqattanǵan janǵa jyly sózimen, jan jylýymen demeý bolyp, úmit jibin bekemdeýge barynsha kúsh salyp kele jatqan Baıan Qýanyshbaıqyzy Kókshetaý medısına ýchılıshesin támamdap, eńbek jolyn bastaǵaly da tabany kúrekteı otyz jyl óte shyǵypty.
– Únemi qaýyrt qımyl ústinde júretin medısına qyzmetkerleriniń ótinishińdi qulaq qoıyp tyńdap, muqııat qaraýynyń ózi syrqatyńdy pyshaqpen sylyp tastaǵandaı áser etedi, – deıdi qala turǵyny Nurlan Alpysbaev, – adam kóńili bir aýyz jyly sózden ósip qalady ǵoı. Bizdiń ýchaskedegi medısına qyzmetkerleriniń minsiz qyzmeti aýyz toltyryp aıtýǵa ábden laıyqty.
Jyly júzinen meıirim shýaǵy esetin, al ár sózinen janǵa jaıly qýat taraıtyn ol bilimdi tájirıbemen ushtastyryp, qıyndyǵy mol, jaýapkershiligi joǵary jumysymen adamdardyń aq alǵysyn arqalap keledi. Aıtýyna qaraǵanda, el kóńilinen shyǵý úshin bilim men tájirıbe azdyq etedi. Árıne ol da kerek, áıtse de eń bastysy óz mamandyǵyńa degen sheksiz súıispenshilik. Sonda ǵana istegen isińnen nátıje shyǵyp, óz qyzmetińe ózińniń kóńiliń tolyp, marqaıýyń múmkin. Senen demeý izdegen, senen járdem tilegen aınaladaǵy adamdar da kóńil kúıińdi, yqylasyń men izetińdi jaza baspaı tanyp, sezinip turady. Mine, súıispenshiliktiń kerek jeri osy. Asylynda bar zeıiniń, yqylasyń men peıiliń aýǵanda ǵana eki arada kózge kórinbeıtin seziný paıda bolmaq.
– Biz eresektermen qatar balalarmen de jumys isteımiz ǵoı, úlken adamdar qaı jeri aýyryp turǵanyn tap-tuınaqtaı etip aıtyp bere alsa, sábıler olaı túsindire almaıdy. Sol úshin medbıke eń birinshi jaqsy psıholog bolýǵa tıis, – deıdi Baıan Qýanyshbaıqyzy.
Eńbegine baǵa beretin de perishte balalardyń peıili eken. О́zine salsa, odan artyq ataq pen qurmettiń esh qajeti joq. Joǵary sanatty medbıke atanýy ujymda, eń bastysy, el ishinde syıly bolýy da ózi áý basta qalap alǵan mamandyǵyna degen súıispenshiligi.
KО́KShETAÝ
