Qoǵam • 16 Qyrkúıek, 2020

Sórede – jergilikti sharýa ónimderi

65 ret kórsetildi

Búginde Aqtóbe ob­lysynyń astyqty aýdandary – Alǵa, Áıteke bı, Qarǵaly, Qobda, Mártók, Hromtaý aýdandary egin orýdy aıaqtaýǵa jaqyndady.

Sharýalar qyrkúıektiń sońǵy kúnderine deıin aýa raıy buzylyp ketpese, jumysty tolyq aıaqtaımyz dep otyr. Áı­teke bı aýdanynyń sharýa qojalyqtary kóktemde 219 myń gektarǵa dán sepken bolsa, onyń 168 myńy – dándi daqyl, 17 myńy – mal azyǵy, 4 myńy maıly daqyldar bolatyn. Alaıda jazdaǵy qýańshylyq egin shyǵymdylyǵyna áser etkendikten, aýdan alqaptarynda bıylǵy astyq túsimi gektaryna 6 sentnerden aınalyp otyr.

Mártók aýdanynda 126 myń gektar alqapqa egis egilse, onyń 62 myń gektary – dándi daqyl, 195 gektary – tary, 5142 gektary – kúnbaǵys pen júgeri. Aýdanda arpa-bıdaı egip, kókónis ósiretin 186 sharýa qojalyǵy tirkelgen. Jeri qunarly Mártók aýdanynyń eginshileri kúzdik bıdaı, tary, júgeri, kúnbaǵys ósirýdi jaqsy jolǵa qoıa bastady. Sonyń ishinde júgerini syǵymdalǵan kúıinde eksporttaý jaqsy tabys kózi ekenin túsindi. Osy aýdanda taýarly sút fermalarynyń kóbeıýine baılanysty iri qara azyǵy úshin kúzdik bıdaı egistigi kólemi ulǵaıyp keledi. Mártók aýdanynyń sharýalary bıyl kúzdik bıdaı dánin kóbirek sebýge ázirlense, al erte kóktemde ekken osy daqyldyń qazirgi ónimi ár gektarǵa 13,5 sentnerden kelip otyr.

Qobda, Mártók, Qarǵaly aýdandary 30 jyl buryn kókónis ósirýmen áıgili bolsa, sońǵy jyldary osy daqyldardy egýdi múlde umytty deýge bolady. Osy kezge deıin jergilikti rynokty Reseı Federasııasynyń Astrahan, Orynbor, Sa­mara oblystarynyń kó­kónisteri men sút ónimderi jaýlap alsa, qazir aýyldaǵy qojalyqtardyń ónimderi Aqtóbe qalasy men aýdan ortalyqtaryndaǵy dúken sórelerine túsip jatyr.

Osylaısha indetke baılanysty Reseıden kartop, sábiz, qyryqqabat ákelinbegendikten, Aqtó­beniń sýpermarketteri men bazar sórelerinde jergilikti ónimderdiń saýdalana bastaǵany aýyldaǵy sharýa qojalyqtaryn yntalandyrýdyń tıimdi joly boldy deýge bolady.

Degenmen, egin oraǵy tolyq aıaqtalǵan soń óńirdegi qojalyqtardyń ju­mystaryna tolyq taldaý júrgizilip, qojalyq ıeleriniń bárimen ashyq áńgime ótkizý qajettigi basy ashyq másele bolyp otyr. О́ıtkeni, sharýalary kelispeı otyrǵan usaq sharýashylyqtar ıeleriniń jerdi paıdalaný, sýbsıdııa alý, tehnıka lızıngine qatysty máseleleri óte kóp.

 

Aqtóbe oblysy

 

Sońǵy jańalyqtar

Uqsas jańalyqtar