Qoǵam • 16 Qyrkúıek, 2020

Estý, tyńdaý, sóıleý qabileti nashar balalarǵa qalaı kómektesýge bolady?

235 ret kórsetildi

Bul kúnderi TOMATIS-terapııa ádisi astanalyq №1 Psıhologııalyq-pedagogıkalyq túzetý kabınetine keletin aıryqsha balalardyń jaqsy estýine, túsinýine jáne sóıleýine septese bastady, dep habarlaıdy Egemen.kz

№1 PPTK-ne TOMATIS TalksUp apparatyn alyp berip jáne osy kabınettiń túzetýshi pedagogyna Máskeýde oqýǵa qoldaý kórsetken "AIаLA" qaıyrymdylyq qory bul isti "KATKO" jáne "Qamqor Menedjment" kompanııalarynyń 2019 jyly Astana Marafonyna korporatıvtik qatysýynan túsken qarajat esebinen júzege asyrdy. 

TOMATIS-terapııa ádisi 75 elde 60 jyldan astam ýaqyt boıy qoldanylyp keledi. Ol durys estýdi qalpyna keltirý múmkindigin kóterip, mıdyń dybystyq sensorlyq joldaýǵa neǵurlym muqııat bolýyna kómektesedi. Bul mı boljaı almaıtyn kútpegen ózgeristerdi shoǵyrlandyrý arqyly júredi. Sonymen qatar ol este saqtaý jáne nazar aýdarý kináratynda, emosııanyń buzylýy, oqý problemasy kezinde kómektesedi jáne aıryqsha balalardyń qozǵalys úılesimdiligin jáne denesin basqarýyn edáýir jaqsartady.

TOMATIS ádisi boıynsha 25 mınýt ishinde bala arnaıy qulaqqap kıip, ózine qyzyqty qyzmet túrlerimen aınalysady: art-terapııa, qum terapııasy elementteri, ártúrli oıyn praktıkalary qoldanylady.

TOMATIS ádisiniń praktıkalyq paıdasyn Nur-Sultan qalasynyń "№1 Psıhologııalyq-pedagogıkalyq túzetý kabıneti" KMM dırektory Baqyt Amrına: "Biz logopedtermen, psıhologtarmen tyǵyz ózara árekettesip jumys isteımiz jáne TOMATIS-terapııa birinshi sabaqtan-aq nátıje bere bastaǵanyn baıqadyq. Basqa ádistemelermen salystyrǵanda onda derbes tásil qoldanylady, kompıýterge baılanystyrylmaıdy, qandaı da bir arnaıy jaǵdaılar jasaý talap etilmeıdi", deıdi.

Bul ádistiń bir baǵdarlama kýrsy 14 kúndi quraıdy. Sabaq kezinde maman balany qadaǵalaıdy jáne ózgeristerin belgilep otyrady. Bul rette balalar ekinshi sabaqtan bastap áreket rettiligin saqtaı otyryp kabınetke qýanyp kiredi (kiredi, amandasady, qulaqqap kıedi jáne ústel basyna otyrady). Sabaqtyń aıaqtalýy habarlanǵan kezde bala qulaqqabyn sheshtirý úshin pedagogqa keledi jáne qoshtasyp, kabınetten shyǵady. Keıbir balalar mýzyka qosylǵan sabaqta tipti bıleı bastaıdy.

Oń ózgeristerdi ata-analary da baıqap otyr: balalar alǵashqy dybystar men sózderdi aıtyp, yntasy, zeıini jaqsaryp, nusqaýlyqty túsine bastaǵan.

"Bizdiń balalarymyz jáne olardyń damýynda bolǵan jaǵymdy ózgerister bul ádistiń tıimdiligin rastap otyr. Sondyqtan men "AIаLA" qaıyrymdylyq qoryna, "KATKO" jáne "Qamqor Menedjment" kompanııalaryna osy tamasha jabdyq úshin alǵysymdy bildirgim keledi. Bul aıryqsha bilim berýge muqtaj balalardyń buzylýyn túzetý úshin mańyzdy jáne qajetti qural", deıdi Baqyt Bekbolatqyzy. 

TOMATIS-terapııa ádisi arqyly №1 PPTK-de 14 bala ótti, taǵy 8 balaǵa osy terapııadan ótý dıagnozy qoıyldy. Al barlyǵy bul kabınetten damýy ártúrli buzylǵan jáne aıryqsha bilim berýge muqtaj 850 bala jyl saıyn ońaltýdan ótedi.

"Bizdiń qor "Aıryqsha balalarǵa – aıryqsha nazar" jobasyn 10 jyldan astam ýaqyttan beri iske asyryp keledi. Osy ýaqyt ishinde biz Qazaqstannyń qalalary men kentterindegi 25 túzetýshi mektep-ınternattarǵa jáne 10 psıhologııalyq-pedagogıkalyq túzetý kabınetterine arnaıy damytýshy jabdyqtar, sonyń ishinde 5 Montessorı bólmesine jáne 19 sensorlyq bólmege jabdyqtar ornattyq. Biz tıimdi TOMATIS ádistemesine byltyr qyzyǵyp, ony dereý Astana Marafony úshin joba retinde usyndyq. Bul ádisti qoldanýdyń osyndaı qysqa merzimi ishinde Qazaqstanda rastalǵan jaǵymdy nátıjeler berýi meni qatty qýantyp otyr. Ázirge TOMATIS elimizde aıryqsha bilim berýge muqtaj balalardy damytýmen aınalysatyn 40-tan astam PPTK-niń bireýinde ǵana bar. Bul ádistemeniń basqa qalalarda qoljetimdi bolýy úshin Birgemiz.kz portalynda qarajat jınap jatyrmyz. Sondyqtan men búkil qazaqstandyqtardy osy jobaǵa járdem berýge jáne aıryqsha balalarǵa qamqorlyq jasaýǵa kúshimizdi biriktirýge shaqyramyn", deıdi "AIаLA" qaıyrymdylyq qorynyń prezıdenti Aıdan Súleımenova.  

Sońǵy jańalyqtar

Elorda «jasyl» aımaqqa ótti

Koronavırýs • Keshe

Uqsas jańalyqtar