Qala basshylyǵynyń qoldaýymen ony iske asyryp jatqan almatylyq sýretshi Bolat Áserbekov. Týyndyny osylaı jasaýdy usynǵan da sol. Portret keramıkalyq plıtalardan qalanýda. Ol qystyń sýyǵyna, jazdyń ystyǵyna tótep beredi. Onyń ústine betine shań qonbaıtyndaı etip arnaýly maımen jyltyratady eken. Aqyn portretiniń aınalasyna qazaqy órnekter qalanbaq. Jumysty júrgizip jatqan Almatydan arnaıy kelgen qurylysshylar.
Aıtýlaryna qaraǵanda, uly aqynnyń mundaı beınesi elimizdiń basqa eshbir jerinde joq. Ras, óskemendik sheberler úıdiń qabyrǵasyn tutas alǵan panno jasaǵan, biraq ol ǵımarattyń ishinde bolatyn. Al mynaý sary aıazy saqyldaǵan Arqanyń tórinde, dalada túskeli tur.
Qazir jumystyń montajdaý jumystary aıaqtalǵan. Endi sheberler sýrettiń ózine kirisip ketken. Eger aldymyzdaǵy 10 kún ashyq bolsa, Abaıdyń aıryqsha beınesi tolyq jasalyp, Qyzyljar kórkin arttyra túskeli tur. Alaıda aıaqtan shalatyn dúnıeler de joq emes. Sonyń ishinde jarnamalyq plakattar men osy úıdiń qabyrǵasynan ashylǵan dúkeniń kondısıoneri jumysqa kedergi keltirýde. Bul másele aldaǵy kúnderde sheshiledi deıdi qurylysshylar.
Aıta ketetin jaıt, Abaıǵa bizdiń qalamyzda eskertkish alǵash ret 2005 jyly qoıylǵan edi. Qalanyń qaq ortasyndaǵy saıabaqta bul eskertkish Abaı men Pýshkınge arnap ashylǵan. Endi myna panno Abaı beınesin Qyzyljar turǵyndaryna jaqyndata túseri sózsiz. Qazirdiń ózinde halyq oǵan tańdanyspen qyzyǵa qarap júr.
PETROPAVL
