Daıyndyq barysy qalaı?
Al qazir munaıly óńirde koronavırýs ınfeksııasynyń ekinshi tolqynyna daıyndyq qalaı órbip jatyr? Aldyn alý sharalary qolǵa alyndy ma? Oblys ákimi Mahambet Dosmuhambetovtiń málimetinshe, dári-dármektiń jetkilikti qory jasaqtalypty.
Degenmen aımaqta áli 300-den astam medısına qyzmetkeri jetispeıdi. Olardyń qatarynda reanımatolog, pýlmonolog syndy mamandar tapshy. Olaı bolsa, óńirdegi dárigerlerdiń biliktiligin arttyrý úshin ne istegen jón?
– Biz kúrdeli kezeńdi bastan ótkerdik. Dərigerlerimizdiń kəsibı sheberliginiń nátıjesinde qıyn jaǵdaıdy eńserdik. Qazir pandemııanyń ekinshi tolqynyna daıyndyqty bastap kettik. Aımaqta qajetti dəri-dərmek qory jasaqtaldy. Stasıonarlardaǵy kerýetter sany da naqtylanyp jatyr. Koronavırýsqa shaldyqqandardy emdeý ózge aýrýy bar naýqastardyń josparly em qabyldaýyna kedergi keltirmeıdi dep kútilýde. Aımaq dárigerleriniń biliktiligin arttyrý úshin konsýltasııa da, basqa áriptesterimen tájirıbe almasý da kerek. Sol sebepten Grýzııadan bes dáriger shaqyryp otyrmyz. Olar atyraýlyq áriptesterine qaýipti indetke shaldyqqandardy emdeýge baılanysty keńes berýmen qatar, bizdiń mamandarymyzdy qaterli vırýsqa qarsy nətıjeli kúres júrgizý úshin daıyndaýǵa atsalysady. Biz úshin oblystyń ekinshi tolqynǵa daıyndyǵy mańyzdy bolyp otyr, – dedi oblys ákimi Mahambet Dosmuhambetov
Grýzııadan kelgen dərigerlerdiń biri Djımsher Ahvledıanıdyń pikirinshe, basty másele – úreıge boı aldyrmaý. Sodan soń naýqastarǵa hattamaǵa sáıkes, em júrgizýde dáldik qajet. Dárigerler men orta býyndaǵy medısına mamandarynyń arasynda áriptestik yntymaqtyń da alar orny erekshe bolmaq. Jalpy medısına salasynyń mamandarynyń naýqastardy emdeýdegi úılesimdi jumysy ǵana naqty nátıjege qol jetkizedi.
– Biz atyraýlyq əriptesterimizge kómek kórsetý úshin óz təjirıbemizben bólisýge daıynbyz. Keńesimizdi tek Atyraýǵa kelgende ǵana berýmen shektelmeımiz. Qazirgideı tehnologııanyń, sonyń ishinde beınebaılanystyń damyǵan dáýirinde keńesimizdi berýdiń múmkindigi artyp otyr. Sondyqtan bizdiń ekijaqty áriptestik baılanysymyz nətıjeli bolaryna senemin, – deıdi grýzııalyq dəriger-reanımatolog Djımsher Ahvledıanı.
Dárigerlerdiń eńbegi elendi me?
О́ńirde qaýipti indettiń salǵan ylańy az emes. Ony turǵyndar da, medısına qyzmetkerleri de kórdi. Oblystyq densaýlyq saqtaý basqarmasynyń basshysy Nurlybek Qabdyqaparovtyń málimdeýinshe, koronavırýs pen vırýstyq pnevmonııany juqtyrǵan atyraýlyqlyqtardyń arasynda 1085 medısına qyzmetkeri de bar. Onyń ishinde koronavırýs juqtyrǵan 561, vırýstyq pnevmonııa dıagnozymen 524 medısına qyzmetkeri tirkeýge alyndy.
Memleket basshysynyń tapsyrmasyna sáıkes koronavırýs ınfeksııasymen kúreske jumyldyrylǵan medısına qyzmetkerlerine naýryz-tamyz aılarynda tólengen ústemeaqynyń kólemi 2 mlrd 145 mln teńgeni qurady. Naqtylaı aıtqanda, 79 medısına qyzmetkeriniń árqaısysyna 2 mln teńgeden ústemaqy tólendi. Qaýipti indettiń saldarynan 13 medısına qyzmetkeri kóz jumǵan edi. Onyń altaýy koronavırýspen, jeteýi vırýstyq pnevmonııany juqtyryp alǵany anyqtaldy. Qaıtys bolǵan eki medısına qyzmetkeriniń árqaısysynyń otbasyna 10 mln teńgeden berildi. Bul baǵyttaǵy jumysty arnaıy komıssııanyń otyrysynda qaraý jalǵasady, – deıdi oblystyq Densaýlyq saqtaý basqarmasynyń basshysy Nurlybek Qabdyqaparov.
Qazir óńir turǵyndaryn emhanalarǵa tirkeý jalǵasyp jatyr. Basqarma basshysynyń aıtýynsha, Atyraý oblysynda turǵyndarǵa 20 medısınalyq mekeme qyzmet kórsetedi. Onyń ishinde 15-i – memlekettik, al beseýi – jeke ıeliktegi medısınalyq mekeme. О́ńirde 651 703 adam turady. Qazir onyń 647 837-si emhanalardyń tirkeýine alynypty. Onyń ishinde 18 jasqa deıingi jasóspirim men balanyń sany 244 322-ni quraıdy. Aýyldardaǵy emdeý mekemelerine 356 524 adam tirkelipti.
Sondaı-aq, oblystyq aýrýhanada, №2 oblystyq juqpaly aýrýlar aýrýhanasynda, kardıologııalyq ortalyq pen Qurmanǵazy, Jylyoı, Qyzylqoǵa aýdandyq aýrýhanalarynda ortalyqtandyrylǵan ottegi stansasynyń qurylys-montaj jumystary júrgizilýde. Endi Inder, Isataı aýdandyq aýrýhanalarynda da osyndaı ottegi stansasyn ornatýdy qarjylandyrý máselesi qarastyrylyp otyr.
Atyraý oblysy
