Shoq juldyzdaı shaǵyn aýyldyń shetine taban iliktirgenińizde aldymen kózge túsetini qoıanjondanyp úıilgen maıa-maıa shóp. Ár úıdiń irgesinde destelengen otyn. Qora-qopsysy jóndelip, shatyrlary bútindelip, jınaqy qalypqa enipti. Qos qaptalǵa kóz salsańyz, beınebir bal arasyndaı qujynaǵan tirshilikti kórer edińiz. Halyq ár kúni jylǵa azyq bolatyn qońyr kúzde qys qamyna kirisken.
– Birlestik, Eltaı, Qaraózek, Jańatilek aýyldarynda 1150 adam turady, – deıdi Sáken Seıfýllın aýyldyq okrýginiń ákimi Aqylbek Bekmaǵambetov, – jaz ortasynda qýańshylyq bolǵan soń ýaıymnyń ıektegeni de ras. Keıin jaýǵan jaýynnyń áserinen shabyndyqtaǵy shóp kóp-kórim kóterilip qaldy. Aýyl turǵyndary 7600 tonna shóp daıyndap, 2 myń tonnaǵa jýyq saban úıip aldy.
Munshalyq shóp daıyndaıtyn da retteri bar eken. Okrýg ákiminiń aıtýyna qaraǵanda, sońǵy jyldary mal basy eki esege deıin kóbeıgen, 32 adam «Sybaǵa» jáne «Altyn asyq» baǵdarlamalary arqyly nesıe alyp, jaıylymdy tórt túlik malǵa toltyrypty. Mal súmesimen kún kórip otyrǵan aýyl adamdary mal azyǵynan tarshylyq kórip otyrǵan joq. Kóbi jem-shópti óz kúshterimen daıyndaýda. Negizinen, ormandy alqaptan turatyn óńirde qunarly shóp jetkilikti.
Aýyldaǵy jalǵyzilikti jandar da janashyrlyqtan qaǵajý qalmaǵan. Qoly qysqa tórt otbasy bar eken. Olarǵa «Qaraózek» JShS otyn-shóbin erterek jetkizip beripti. Osy oraıda, seriktestiktiń shapaǵatyn ekpin túsire aıta ketsek te artyq bolmas. Okrýg ákiminiń aıtýyna qaraǵanda, keı óńirlerde qysta qar tazalaý kádimgideı másele bolyp jatsa, munda bul tarapta birde-bir másele týyp kórmegen. Nebir aqtútek borandarda aýyl-aýyldyń arasyndaǵy joldy qasat qar ala qalsa, seriktestiktiń qýatty tehnıkalary áp-sátte tazalap tastaıdy.
Biryńǵaı qazaq aýyldary bolǵan soń bir-birine degen qolǵabys kómekteri de mol. Jalǵyz adam qansha jerden umtylsa da, ormannan otyn kesip, shabyndyqtan shóp tasý kezinde qınalyp qalar edi. Mundaǵy jurt bir-birimen ujymdasyp, qys qamyna qapysyz daıyndalady. Máselen, bireýdiń traktory bolsa, endi bireýdiń shóp artatyn agregaty bar. Tirkeme ústindegi shópti jaıýǵa da, shashylǵanyn jınaýǵa da qol kúshi kerek. Mine, osyndaı qysyltaıań sátte tize qosý, «kórshi haqysy – táńir aqysy» degendeı, aýyldasynyń kótere almaı jatqan júgine ıyǵyn tóseý tárizdi qoǵamdasýdyń barlyǵyna kózimiz jetip, bir qanattanyp qaldyq. Qansha aıtqanmen bir aýyl, bir baýyr bolyp tirshiliktiń tútinin tik ushyryp kún keship jatqan aǵaıynnyń alys-berisi esepke qurylmaı, aq kóńildiń lúpilimen biriniń júregin biri jylytyp, tirshiliktiń kúrmeýi kóp túıinin sheshýge atsalysyp jatqandyǵy qandaı ǵanıbet?!
Jalǵyz-aq másele, okrýgtegi úsh bilim oshaǵyn jylytý. Jańa tártip boıynsha jylytý máselesimen birneshe jyldan beri seriktestik aınalysady. Kómirin satyp alatyn, ony tasymaldaıtyn, ot jaǵýshyny ustaıtyn da solar. Tek bir áttegen-aıy, arzan kómir satyp alyp, qysta onysy janbaı, bilim oshaqtary salqyndap ketetin ýaqyttar da bolady eken. Negizgi oı durys bolǵanymen, jaqsy janatyn kómir alýlaryn qadaǵalaý kerek.
Qońtorǵaı kúı keship jatqan tórt aýyl elbesip-selbesip, bir-birine jan jadyratar sharapatyn tıgizip, qys qamyn erterek oılaǵandarynyń nátıjesinde qabaǵy qatý «kári qudanyń» aqyrǵan aıazy men shymshyp oınaıtyn qaljyńynan qymsynatyn emes.
Aqmola oblysy,
Zerendi aýdany
