Bul sharanyń ótýine Túrkistan oblysy qoǵamdyq damý basqarmasy men adamı áleýetti damytý basqarmasy muryndyq bolǵan. Ashyq aspan aıasynda, saqtyq sharalaryn saqtaı otyryp ótkizilgen semınar-trenıngke 300-ge jýyq mektep belsendileri men "О́zin-ózi basqarý" uıymdarynyń kóshbasshylary jáne ustazdar qatysty.
Uıymdastyrýshylardyń aıtýynsha, mundaı trenıngti ótkizý jastardy úzdiksiz damý men qoǵamdyq ómirge beıimdelýge, oı-jıegin keńeıtip, jaýapkershilikke daǵdylandyrýǵa yqpal etedi. Qazirgi tańda oblys boıynsha 160 000 astam oqýshy bolsa, onyń 5256 "О́zin-ózi basqarý" uıymynyń múshesi, al 876 oqýshy kóshbasshy prezıdentteri bolyp júr.
Olardyń sany men sapasyn álide arttyrýdy kózdegen sharany Túrkistan oblysy "О́zin ózi basqarý" uıymynyń kóshbasshysy Meıirbek Áneli bastap, atalǵan uıymnyń erejeleri men josparyn tanystyrdy. Sondaı-aq mundaı qoǵamdyq jumystardyń qalyptasý jolyndaǵy paıdalaryna toqtaldy.
Ári qaraı jas belsendilerge Túrkistan oblysy Qoǵamdyq damý basqarmasy "Jastarmen jumys" bóliminiń basshysy Seıdýlla Keńesbaıuly "Kóshbasshylyq qabilet" týraly trenıng ótip, onyń mańyzdylyǵyn aıtty.
"Qazirgi qoǵam jastardan áleýmettik tanymy mol, belsendi jáne saýatty bolýdy ǵana emes, kóshbasshylyq qabiletti de talap etedi. Kóshbasshy – uıymǵa ǵana emes, qoǵamǵa da yqpal ete alatyn bolýy kerek. Ol óziniń maqsat-múddesin tolyq sezinip, ony qorǵaı bilýi qajet. Al mundaı minezderdi qalyptastyrý jolynda "О́zin-ózi basqarý uıymdary" men osyndaı trenıngterdiń mańyzy zor",- dedi Seıdýlla Keńesbaıuly.
"О́zin-ózi basqarý" uıymdarynyń jumysyn kúsheıtý maqsatynda ótken shara Túrkistan qalasynan keıin, Ordabasy, Túlkibas, Tólebı, Qazyǵurt aýdandarynda jalǵasady. Mundaı jobalar jastardyń ómir aǵymdaryna boı aldyrmaı, sanaly, saýatty eńserýine jaǵdaı jasaý maqsatynda júıeli túrde uıymdastyrylyp otyrýy qajet.
