«Osy ýaqytta kóptegen otbasy qıyn jaǵdaıǵa tap boldy. Álbette, eshkim pandemııa bolaryn aldyn ala bilgen joq, degenmen elimizde balalaryn qajetti tehnıkamen qamtamasyz ete almaıtyn otbasylardyń bary anyq. Al kompıýter qazirgi kezde oqýshylar úshin mańyzdy qurylǵyǵa aınalyp otyr. Osy oraıda bizdiń «Ulttyq volonterlik jeli» «Best for kids» qoǵamdyq qorymen birlesip kópbalaly otbasylarǵa kompıýterler syılady. On monoblokty «Kaspi Bank» AQ satyp alyp berdi, bir kompıýterdi volonter berdi. Kompıýterler tolyǵymen dıagnostıkadan ótkizildi, paıdalanýǵa daıyn», deıdi respýblıkalyq front-ofıs menedjeri Quralaı Jarqymbaeva.
«Ulttyq volonterlik jelige» bul iste qolǵabys etken «Best For Kids» qoǵamdyq qory balalar úılerindegi jetkinshekteri áleýmettendirýmen aınalysady. Otbasylardy Ulttyq volonterlik jeli iriktedi. Olarǵa buǵan deıin de volonterlerden azyq-túlik sebetteri túrinde kómek kórsetilgen-di.
Ulttyq volonterlik jeliniń elimizdegi volonterlik mádenıetin arttyrýǵa, balalardy áleýmettendirýge baǵyttalǵan sharalary osymen toqtaǵan joq. Uıym IýNISEF-pen birlesip ınklıýzıvti qoǵam balalarynyń quqyqtary týraly volonterler úshin onlaın-oqytýdy qolǵa aldy.
«Ár balanyń bilim alýǵa quqyly jáne múmkindigi shekteýli balalar da osy qatarda. О́kinishtisi, bizdiń elde ınklıýzıvti qoǵam ókilderi dıskrımınasııaǵa jıi ushyraıdy. Olardyń áleýmettenýine, bilim alýyna jaǵdaı jetkiliksiz», deıdi Quralaı Jarqymbaeva.
Volonterlerge BUU Balalar qorynyń (IýNISEF) Qazaqstandaǵy turaqty ókili Artýr van Dızen, Aqparat jáne qoǵamdyq damý mınıstrliginiń Azamattyq qoǵam isteri komıtetiniń tóraǵasy Madııar Qojahmet, IýNISEF-tiń Nıý-Iorktegi ókili Eleanor Zeıtlın, IýNISEF izgi nıet elshisi, belgili shahmatshy Dınara Sádýaqasova, «Ulttyq volonterlik jeli» qoǵamdyq qorynyń atqarýshy dırektory, «Birgemiz» respýblıkalyq volonterler Front-ofısiniń basshysy Tatıana Mıronıýk, «Balalar quqyǵy» baǵytynyń úılestirýshisi Aleksandra Krashınına, «Inklıýzıvti qoǵam» baǵytynyń úılestirýshisi Álibı Qaramýrzın dáris oqıdy.
«Balalar úshin teń múmkindikter qamtamasyz etý – IýNISEF úshin Qazaqstanda da, búkil álemde de mańyzdy mindetterdiń biri. Bul shara Qazaqstan 1994 jyly qosylǵan Bala quqyqtary týraly Konvensııaǵa sáıkes balalardyń ómir súrý, damý jáne áleýetin tolyq iske asyrý quqyǵyn qorǵaýdy bildiredi. Biz tek onymen shektelip qalmaı, «Bapkerlerge arnalǵan trenıng» respýblıkalyq mektebiniń jumysyn qolǵa aldyq. «Birgemiz» respýblıkalyq volonterler front-ofısiniń uıymdastyrýymen iske qosylǵan joba úılestirýshisi – «Ulttyq volonterler jelisi» qory», deıdi Q.Jaqsymbaeva.
28 tamyzda jumysyn bastaǵan respýblıkalyq mektepke respýblıka boıynsha 43 adam iriktelip alynǵan. Olar sóıleý mánerinen bastap bapkerlerge qajet basqa da daǵdylaryn arttyrady. Oqý baǵdarlamasyn taldaý, bapkerlerge qoıylatyn talap-mindetterge qatysty talqylaýlar, balalarmen jumys negizderinen bólek praktıkalyq sabaqtar da ótkiziledi. Oqytý qazaq jáne orys tilderinde júrgizilip jatyr.
Uıymdastyrýshylardyń aıtýynsha, mektep jumysy aıaqtalǵannan keıin bapkerler aqparatty durys jetkizý, balalarmen sóılesý, olarmen qarym-qatynas qurý, kópshilik aldynda sóıleý, jeke oqý baǵdarlamasyn qurý sııaqty daǵdylardy meńgerip shyǵady. Sonymen qatar alǵashqy 43 qatysýshy úırengenderin óz óńirlerindegi bapkerlerge de úıretedi degen jospar bar.
