Sýretti túsirgen Erlan OMAR, «EQ»
Volonterlerdi qoldaý ortalyǵy oblystyń jastar resýrstyq ortalyǵynyń janynda jumys isteýde. Búginde oblysta 84 ortalyq izgi nuryn seýip, qamqorlyq qanatyn keń jaıyp keledi. Nur Otan partııasy Aqmola fılıaly janynan ashylǵan volonterlik sheberlik mektebi de ıgi iske zor yqpalyn tıgizýde.
Ásirese jaman tumaý jaılaǵan kezde jalpaq jurt jalyndy jastardyń izgilik tunǵan izetti is-qımylynan kóp demeý kórdi. О́z bastaryn qaterge tigip júrse de, halqynyń qamyn oılaǵan jastar jalǵyzilikti adamdarǵa dári-dármegin, azyq-túligin jetkizip berip, alǵysqa bólendi. Alǵashqy jartyjyldyqta oblys boıynsha 1250-den astam jaqsy isterge uıytqy bolatyn sharalar ótkizildi. Onyń ishinde onlaın keńes berý, onlaın konkýrstar, «Biz birgemiz!» aksııalary jáne talaı jastyń kókireginde eljandylyq pen ultjandylyq sezimderin oıatatyn «Patrıotızm saǵaty» jobasy bar.
«Kúmis volonterlikti» damytý aıasynda «Biz birgemiz!» qoǵamdyq qory karantın kezinde de belsendi jumys istedi. Qor eriktileriniń tize qosýymen «Aıalaý» múmkindigi shekteýli balalarǵa arnalǵan ortalyqtyń kire berisi men tambýryna kúrdeli jóndeý jumystary júrgizildi. Oblystyq ádilet departamenti halyqtyń quqyqtyq saýattylyǵyn arttyrý jáne azamattarǵa quqyqtyq máseleler tóńireginde keńes berý barysynda stýdent volonterlerdi tartý arqyly arnaıy is-josparlaryn jasap, kestesi bekitilip, qyrýar jumys atqaryldy. Osy kezeńde joǵaryda aıtylǵan taqyryptarǵa oraı keńester úzbeı ótkizildi. Saıajaılarda turatyn halyqtyń áleýmettik jaǵynan az qamtamasyz etilgen toptaryna konsýltasııalyq kómek kórsetildi. Naqtyraq aıtsaq, stýdentterdiń ózi 113 quqyqtyq keńes bergen eken. Oblystyq ekologııa departamenti óńirlik ekologııalyq slet ótkizdi. Bul sharaǵa 100-den astam erikti qatysty. Esepti kezeń ishinde Ekologııa, geologııa jáne tabıǵı resýrstar mınıstrligi Orman sharýashylyǵy jáne janýarlar dúnıesi komıtetiniń Aqmola oblystyq orman sharýashylyǵy jáne janýarlar dúnıesi aýmaqtyq ınspeksııasy 50-den astam eriktini jumyldyra otyryp, ańshylyq sharýashylyǵy aýmaǵynda jabaıy janýarlardy azyqtandyrý is-sharalaryn uıymdastyrdy.
KustoGroup halyqaralyq kompanııasy qashyqtan oqytý kezinde aýyldyq jerlerde turatyn áleýmettik jaǵynan az qamtylǵan jáne kópbalaly otbasylardyń oqýshylaryna ondaǵan noýtbýk alyp berdi. Tildik onlaın-kýrstar, UBT-ǵa onlaın daıyndyq iske qosyldy. Osy oraıda 46 sabaq ótkizildi. Sondaı-aq karantın kezinde janashyrlyq tanytqan kompanııa volonterlik uıymdarmen birlese otyryp, bir jıyntyǵy 14 myń teńge shamasynda bolatyn azyq-túlik paketterin jetkizýdi qolǵa aldy. Mundaı kómek oblys ortalyǵyndaǵy 500-den astam otbasyǵa jasaldy. Azyq-túlik paketterin jetkizýge avtovolonterler de jumyldy.
Atbasar qalasynda halyqtyń áleýmettik jaǵynan az qamtylǵan toptaryna kómek kórsetý maqsatynda aýyl sharýashylyǵy taýar óndirýshileriniń bastamasymen «Qamqor» ashyq arnaıy qory quryldy. Bankte esepshot ashylyp, aýdan azamattary aqshadaı qarajat jınady. Qor bul aqshaǵa azyq-túlik sebetterin satyp aldy. Uzyn-yrǵasy 20 mln teńgeden astam qarajat kóleminde kómek kórsetildi. Joǵary kópsalaly azamattyq qorǵaý kolledjiniń erikti bilim alýshylary «Balalarǵa teatr» jobasyn iske qosyp, rýhanı azyq nárimen sýsyndatýdy qolǵa aldy. 35-ten astam qyzǵylyqty qoıylym uıymdastyryldy.
Aqmola aýrýhanalaryna ondaǵan ókpeni jasandy jeldetý apparattary jetkizildi. Kókshetaýdaǵy «Tynys» zaýyty oblystyq densaýlyq saqtaý basqarmasyna osyndaı apparattyń 77-sin tapsyrdy. Qorǵaljyn aýdanynyń medısına qyzmetkerleri Dauletten qaıyrymdylyq qorynan 4 ottegi konsentratyn aldy. Makınsk qus fabrıkasy dári-dármek satyp alý úshin 7 mln teńge bóldi.
Ústimizdegi jyldyń alǵashqy jarty jyldyǵynda «Volonterlerdi qoldaý ortalyǵynyń» oblystyq front-ofısi qozǵalysty damytýǵa baǵyttalǵan birqatar is-sharalar ótkizdi. Onyń ishinde «Jaqsylyq joly» aksııasy, «Úıde birge oqımyz» chellendji, «Bir el, bir taǵdyr» tárizdi mazmundy sharalardy aıta ketýge bolady. «Erlikke taǵzym» chellendji máni men mazmuny jaǵynan alyp qaraǵanda aıta qalarlyqtaı shara boldy.
Jaman tumaý jan alqymnan alǵan kezde psıhologııalyq kómektiń de qajet bolǵandyǵyn aıta ketýimiz kerek. Oblystyq ishki saıasat basqarmasy men Aqmola oblystyq azamattyq alıansy birlese otyryp, psıhologııalyq qoldaý qyzmetin uıymdastyrdy. Tus-tusta ras-ótirigi belgisiz, adam janyn túrshiktiretin túrli habar órship turǵan ýaqytta eldi sabasyna túsirý úshin talaı jumys atqaryldy. Tájirıbeli jeti psıholog ýaqytpen sanaspaı qyzmet etti. Bul isten eriktilerdi qoldaý ortalyǵynyń ókilderi de shet qalǵan joq. Jumys ýaqytynda qoldaý qyzmetine 80-nen astam adam júgindi. Taqyryp ta ýaqytsha qıyndyq týrasynda. Jaman tumaýǵa baılanysty jaǵdaı, otbasylyq qarym-qatynastyń birqatar kúrdeli máseleleri tolǵandyrǵan adamdar úmit jibin jalǵady.
«Zvezdnyı» balalardy saýyqtyrý ortalyǵynda volonterler qaterli isikke shaldyqqan 14 jasqa jan jylýymen demeý boldy. Sondaı-aq áleýmettik jaǵynan az qorǵalǵan jastarǵa da ómirden óz ornyn tabýǵa kómek qoldaryn sozdy. «Fenıks» eriktiler ortalyǵy múmkindigi shekteýli jandarǵa kómek kórsetý boıynsha dıspetcherlik qyzmet jobasyn uıymdastyrdy. Bul oraıda da sýsap otyrǵan suranys bar eken. Táýligine 100-ge jýyq jas habarlasyp, baǵyt-baǵdar aldy. El irgesin bekitýge, jastardy jaqsylyqqa jumyldyrýǵa baǵyttalǵan táp-táýir shara jaqsy nátıje berdi. Máselen, Chaglınka joǵary agrotehnıkalyq kolledjiniń bilim alýshylary «Sezimtal júrekter» aksııasyn uıymdastyryp, kolledjdiń aýyr naýqasqa shaldyqqan bilim alýshysyna qarajat jınaý úshin kommersııalyq fýtbol matchyn uıymdastyrdy. Men jaqsylyq jasasam eken deıtin jan jadyratar izgi nıettiń kóptigi bul joly da baıqaldy. Atalǵan aksııaǵa 150-den astam adam qatysyp, kómek qolyn sozdy.
Jastar resýrstyq ortalyǵynyń uıytqy bolýymen ekologııalyq aksııalar júıeli túrde júrgizildi. Mektep oqýshylary, kolledjder men joǵary oqý oryndarynyń stýdentteri is-sharalarǵa belsene qatysyp, bilim oshaqtarynyń, mektepke deıingi mekemelerdiń, qarttar úıleriniń, Uly Otan soǵysy ardagerleriniń aýlalaryn tazalady. О́tken qaqaǵan qysta da osyndaı kómek kórsetilip, 50 tonnaǵa jýyq qar shyǵaryldy. Sóıtip, jas tolqyn 1 319 zeınetkerge, jalǵyzilikti jandarǵa janashyrlyq kórsetti. Ústimizdegi jyldyń mamyr aıynda «О́mir joly» qoǵamdyq qory «Mıras» qorymen birlese otyryp, «О́zińe sen» jobasyn iske asyrýǵa kiristi. Qıyn jaǵdaıǵa tap bolǵan eldesterine kómek qolyn sozdy. Nátıjesinde 56 muqtaj adam jastardyń jan jylýyn sezinipti.
Jaqsy istiń taǵy bir arnasy – «Babalar eskertkishteri – urpaqqa amanat» jobasy. Ata murasyna adal jastar óńirdegi tarıhı oryndardy qoqystardan tazartyp, kútimge aldy. El ishinde ekologııalyq mádenıetti nasıhattaý jumystaryn júrgizdi. 300-den astam eriktini qamtıtyn 25-ke jýyq ekologııalyq senbilikter uıymdastyryldy. Uly Jeńistiń 75 jyldyǵyna oraı Uly Otan soǵysynyń obelıskileri men eskertkishterin syrlap, aqtap, abattandyrdy. Osy bir janashyrlyq qımyldan-aq el ótkenine degen erikti jastardyń júrek qalaýyn ańǵarýǵa bolady.
Aqmola oblysy
