Shilde aıynda oblystyq kásipkerlik basqarmasy jergilikti aqparat quraldary men áleýmettik jelilerde konkýrs shartyn jarııalaǵan kúnnen bastap, komıssııaǵa qyrkúıektiń ortasyna deıin 204 bıznes-joba usynyldy. О́tken aptada quramyna joǵary oqý oryndary oqytýshylary, aqparat quraldary ókilderi, kásipkerler kirgen 11 adamnan turatyn konkýrstyq komıssııa joba avtorlary usynǵan beınerolıktermen tanysty. Sodan keıin komıssııa músheleri aldynda jobalaryn onlaın rejımde qorǵap shyqty.
Aqtóbe oblystyq kásipkerlik basqarmasynyń basshysy Nurhan Tileýmuratovtyń habarlaýynsha, «Bıznestiń jol kartasy-2025» baǵdarlamasy boıynsha beriletin grant somasy bıyl eki esege ulǵaıǵan. Máselen, byltyr osy baǵdarlamaǵa Aqtóbe oblysynda 63 mıllıon teńge bólinse, bıyl kásipkerlikti qoldaý 140 mıllıon teńgege arta túsken.
Komıssııa qaraýyna kelip túsken bıylǵy 204 jobanyń 85 paıyzyn aýyl turǵyndary usyndy. Onyń ishinde jıhaz jasaý, aýyl sharýashylyǵy ónimderin óńdeý, jylyjaı salý, avtokólik jóndeý, qurylys shegesin jasaıtyn óndiris ashý, tigin sheberhanasyn qurý, tamaq ónimderin jasaý, turmystyq qaldyqtardy kómetin polıgon salý jobalary maquldandy. Aýyl kásipkerligin damytýǵa nıet bildirgen 6 kóp balaly ana, 29 jasqa deıingi 12 azamat jobalaryn sátti qorǵap shyqty. Osy joly usynylǵan joba sany men kásipkerlikpen aınalysýǵa belsendilik tanytýy jaǵynan Áıteke bı, Shalqar aýdandarynyń turǵyndary erekshelendi. Maquldanǵan árbir jobaǵa bólingen bıylǵy grant somasy ártúrli. Eń tómengisi 1 mıllıon 200 myń teńgeden bastalyp, jobanyń aýqymdylyǵyna qaraı 2 mıllıonnan 5 mıllıon teńgege deıin ósken.
Bul joly kásipkerlikpen aınalysýǵa nıet bildirgen 170 turǵyn qaıtarymsyz grantqa qol jetkize almady. Al, maquldanǵan árbir joba boıynsha bólingen qarjynyń maqsatty jumsalýyn qadaǵalaıtyn jáne kásipkerlerge jumysty uıymdastyrýǵa kómektesetin bıznes-jetekshi bekitildi.
