Aımaqtar • 28 Qyrkúıek, 2020

Káriz aýystyrýdyń tyń tásili

550 ret

kórsetildi

1 mın

oqý úshin

Jer asty qubyrlary men káriz júıelerin aýystyrý kúrmeýi kóp kúrdeli isterdiń qataryna kiredi. Mundaı kezde jer ústi tósenishteri qazylyp qyryq qaryz shuńqyrlar paıda bolady. Qolaısyz kórinis turǵyndardyń júrip turýyna jáne avtokólikter qozǵalysyna ájeptáýir kedergi keltiredi. Ári mundaı jaǵdaıda abaılamasa apan shuńqyrǵa úlkender men balalardyń qulap ketý qaýpi týyndaıdy. Sondaı-aq kúrdeli jóndeýler kezinde sý júıeleri aıyrylyp bul úzilis ony tutynatyn el-jurt pen áleýmettiń oryndy ókpe-renishi men narazylyǵyn týǵyzýy ábden múmkin, dep habarlaıdy Egemen.kz

Temir QUSAIYN

Osy oraıda jer astyndaǵy káriz júıelerin aýystyrý men jańǵyrtýdyń mundaı eski tásilinen bas tartyp onyń álemdik standarttarǵa saı jańa zamanaýı tetikterin tájirıbege engizgen aqsaılyq maman-jumysshylardyń bastamasy bárekeldi deýge ábden laıyqty. Jańa tásildiń basty ózgesheligi men artyqshylyǵy joǵaryda aıtylǵandaı jaǵymsyz jáıtterdiń bir de biri bolmaıdy. Naqtyraq aıtqanda jumys úderisi kezinde jer ústi astan-kesten bolyp qoparylmaıdy. Ári sý júıeleri aıyrylmaıdy.

- Bul salalyq termın tilinde sonasııa tásili dep atalady. Ony Aqsaı qalasyndaǵy káriz júıelerin jańǵyrtý kezinde tusaýkeser joba retinde tuńǵysh ret qoldanǵan edik. Ony paıdalaný arqyly Halyqtar dostyǵy kóshesinen Syrym Datov jáne temirjol kóshesine deıin 1769 metr quraıtyn jer asty káriz júıeleri kúrdeli jóndeýlerden ótkizilýde. Qazir qubyr aýystyrý jumystary márege taıap keledi. Jobanyń jalpy quny 553 mıllıon teńge quraıdy, deıdi tyń tásil jóninde Bórli aýdanynyń ákimi Mırjan Satqanov.