1 qazanda Qazaqstanda Qarttar kúni atap ótiledi. Elimizde 2 mıllıonnan astam zeınetker turady. Ár azamattyń laıyqty qarttyq shaǵyn qamtamasyz etýge qamqorlyq jasaý - Úkimettiń áleýmettik saıasatynyń basty mindetteriniń biri. Memleket azamattardy zeınetaqymen qamsyzdandyrýdy jaqsartý boıynsha júıeli túrde sharalar qabyldap keledi.
Máselen, 2020 jylǵy 1 qańtardan bastap jyl saıynǵy ındeksteý nátıjesinde yntymaqty zeınetaqy mólsheri 7%-ǵa ósti, bazalyq zeınetaqynyń ulǵaıýy 5%-dy qurady.
Memleket basshysynyń tapsyrmasyn oryndaý maqsatynda, aǵymdaǵy jyldyń 1 sáýirinen bastap taǵaıyndalǵan zeınetaqy mólsheri qosymsha taǵy 5% ındeksteldi. Bul 2019 jylǵy deńgeımen salystyrǵanda bazalyq zeınetaqynyń 10%-ǵa, yntymaqty zeınetaqynyń 12% -ǵa ósýin qamtamasyz etti.
Osyndaı ósim nátıjesinde jıyntyq zeınetaqynyń eń tómengi mólsheri (yntymaqty+bazalyq) 58 myń teńgeden asady, al joǵarǵy shegi 128,5 myń teńgeni quraıdy. Sonymen qatar, azamattar, BJZQ-dan ózderi jınaqtaǵan qarajat esebinen zeınetaqy tólemderin alady.
QR Eńbek jáne halyqty áleýmettik qorǵaý mınıstrligi aǵa býyn ókilderiniń jaǵdaıyn jaqsartý úshin 2025 jylǵa deıingi "Belsendi uzaq ómir" ulttyq is-qımyl josparyn jasady. Ony qabyldaý egde jastaǵy azamattardyń qoǵamnyń túrli salalaryna qatysý múmkindigin keńeıtedi jáne de olardy memlekettik qoldaýdyń sapaly sharalarymen qamtamasyz etedi. Ult jospary aıasynda ár aımaqta belsendi uzaq ómir súrý ortalyqtaryn ashý josparlanýda.
Qazirgi ýaqytta 113 stasıonarlyq mektep-ınternattyń, jergilikti bıýdjet esebinen 58 kúndizgi stasıonardyń aýqymynda 5 myńnan astam qart adam arnaıy áleýmettik qyzmettermen qamtylǵan. Úıdegi áleýmettik kómek bólimderi shamamen 52 myń qart men múgedekke qyzmet kórsetedi.
Qarttar kúni aıasynda Nur-Sultanda, sondaı-aq Aqmola, Aqtóbe, Atyraý, Qaraǵandy, Mańǵystaý, Pavlodar, Soltústik Qazaqstan, Túrkistan oblystarynyń jekelegen aýdandarynda 216,7 myń adamdy qamtıtyn 2,3 mlrd teńge kóleminde birjolǵy qarjylaı kómek kórsetiledi.
Jalpy, aǵymdaǵy jyly, jergilikti bıýdjet múmkindikterin eskere otyryp jáne bıznestiń áleýmettik jaýapkershiligi sheńberinde 15,2 mlrd teńgeden astam qarajat bólindi (onyń ishinde jergilikti bıýdjetten - 14,2 mlrd teńge, tartylǵan qarajat esebinen - 1 mlrd teńge):
- Uly Otan soǵysyndaǵy Jeńis kúnine birrettik materıaldyq kómekke - 7,6 mlrd teńge (123,6 myń adam);
- azyq-túlik sebetin berýge - 1 mlrd 481,1 mln teńge (233,4 myń adam);
- jeńildikpen dári-dármekpen qamtamasyz etýge - 174,2 mln teńge (40,8 myń adam);
- tisti protezdeýge - 142,7 mln teńge (3 myń adam);
- shıpajaılyq emdelýge - 1 mlrd 362,3 mln teńge (19,5 myń adam);
- turǵyn úıdi jóndeýge - 46,4 mln teńge (376 adam);
- otynmen qamtamasyz etýge - 136,1 mln teńge (3,7 myń adam);
- qoǵamdyq kólikte jeńildikpen júrýge - 740,7 mln teńge (133,9 myń adam);
- kómektiń basqa túrlerine - 3 498,8 mln teńge (134,0 myń adam).
