Sharýalardyń aıtýynsha bir ǵana Baıkenje aýyldyq okrýginde 200-deı jylqy aýyryp ólgen, al aýdan boıynsha dertten qyrylǵan túlik sany 400-den asady. Jergilikti turǵyndar veterınarlar keńesimen malǵa dári egip te, berip te kóripti. Biraq odan da qaıran bolmaı tur. Amaly taýsylǵan aýyldaǵylar endi shyǵyndarynyń ótelýin surap otyr.
Osy máselege baılanysty óńirlik kommýnıkasııalar qyzmetinde oblystyq veterınarııa basqarmasynyń basshysy Ersultan Ápetov pen veterınarlyq baqylaý jáne qadaǵalaý komıtetiniń aýmaqtyq ınspeksııa basshysy Jandov Sársenbaev BAQ ókilderine arnap brıfıng ótkizdi.
Oblystyq veterınarııa basqarmasynyń basshysy jergilikti veterınarııalyq dárigerler aýrý oshaǵynda bolǵanyn, belgisiz derttiń belgilerine qarap, "jylqy gastrofılezi" boljamdy dıagnozy qoıylǵanyn atap ótti. Aýdandyq veterınarııalyq zerthanada bul dıagnoz naqtylanǵan. Osylaısha tórt aýyldyń jylqysyna tóngen qater kádimgi bógelekten shyqqany belgili boldy.
"Veterınarlardyń anyqtaýy boıynsha naqty ólgen jylqynyń sany 29 bas. Aýyrǵan 94 jylqynyń alpys úshin mal dárigerleri emdep jazyp aldy. Sondyqtan, da júzdegen mal shyǵyn boldy degen derek orynsyz. Bul aýrý parazıtarlyq aýrýlarǵa jatatyndyqtan, aýrýǵa qarsy veterınarııalyq is-sharalar mal ıesiniń óz qarajaty esebinen júrgiziledi. Jylqy gastrofılezi aýrýy Qazaqstan Respýblıkasy Aýyl sharýashylyǵy mınıstriniń 2014 jylǵy 30 qazandaǵy №7-1/559 buıryǵymen bekitilgen "Janýarlardyń jáne adamnyń densaýlyǵyna qaýip tóndiretin janýarlardy, janýarlardan alynatyn ónimder men shıkizatty mindetti túrde alyp qoıý jáne joıý júrgiziletin kezdegi janýarlardyń asa qaýipti aýrýlarynyń" tizbesine engizilmegendikten mal ıelerine ótemaqy qarastyrylmaıdy", - dedi oblystyq veterınarııa basqarmasynyń basshysy Ersultan Ápetov.
