О́ndiristik jaraqattaný azaımaı tur

Sharaǵa Eńbek, áleýmettik qorǵaý jáne kóshi-qon komıteti tóraǵasynyń orynbasary – bas memlekettik eńbek ınspektory Tólegen Ospanqulov, Qaraǵandy oblysy ákiminiń orynbasary Álisher Ábdiqadyrov, Qaraǵandy oblysy boıynsha eńbek ınspeksııasy basqarmasynyń basshysy Irına Lıýbarskaıa, Indýstrııalyq damý jáne ónerkásiptik qaýip­sizdik komıtetiniń Qaraǵandy oblysy boıynsha departamentiniń basshysy Baıken Jumabaev, Qaraǵandy oblysy ónerkásip jáne ındýstrııalyq-ınnovasııalyq da­mý basqarmasynyń basshysy Ǵalymjan Jumasultanov, oblystyń ónerkásiptik kásip­oryn­darynyń basshylary, áleý­mettik seriktester jáne taǵy basqa taraptar qatysty.

Kezdesýge qatysýshylar óndi­ris­tegi jaraqat alý oqıǵa­laryn, olardyń sebepteri men jaǵ­daılaryn talqylady. T.Ospan­qulov Qazaqstandaǵy óndiristik jaraqattaný boıynsha aǵymdaǵy ahýaldan habardar etti.

«Jazataıym oqıǵalar men­ ká­sibı syrqattar tek qa­na adam taǵdyryna zardap kel­ti­rip qoı­maı, ekonomıkaǵa da aıtar­lyqtaı zııan ákeledi. Halyqaralyq eńbek uıymynyń maǵlumatynsha, osy keleńsizdikter sebebinen jyl saıyn álemdik ekonomıka jalpy ishki ónimniń 4%-dan astamynan aıyrylady. О́kinishke qaraı, mundaı shyǵyndar Qazaqstanda da bar. Respýblıka uıymdarynda jylyna 1,3 myńnan astam baqyt­syz jaǵdaı bolyp, olardyń saldarynan 200-den astam adam kóz jumady», dedi ol.

Bas eńbek ınspektorynyń aıtýynsha, elimizdiń 2,5 myńnan astam iri kásiporny halyqaralyq jáne ulttyq eńbek qaýipsizdigi jáne eńbekti qorǵaý standarttaryn engizgen, onyń 149-y Qara­ǵandy oblysyna tıesili.

Sonymen qatar jumys oryn­da­ryndaǵy eńbek jaǵdaıynyń naqty ahýalyn baǵalaý jáne bıylǵy 6 aıdyń qorytyndysy boıynsha eńbekti qorǵaý jónindegi is-sharalar keshenin júrgizý úshin 548 óndiris­tik nysan attestasııadan ótti.

«2015 jyldan 2019 jylǵa deıingi kezeńde eńbekti qorǵaý salasyn­daǵy qabyldanǵan ke­shen­di sharalardyń nátıje­sinde kásiporyndardaǵy jaraqat 17%-ǵa tómendedi. Alaıda osy jyl­dyń 8 aıynda el kásip­oryn­da­rynda 912 adam zardap shekti, bul ótken jyldyń sáıkes kezeńi­men salystyrǵanda 7,5%-ǵa kóp», dedi T.Ospanqulov.

Zardap shekkender sanynyń ósýi, Eńbek, áleýmettik qorǵaý jáne kóshi-qon komıteti tóraǵa­sy orynbasarynyń aıtýynsha, Qaraǵandy (122 adamnan 159 adamǵa deıin), Qostanaı (64 adamnan 86 adamǵa deıin), Túrkistan (27 adamnan 64 adamǵa deıin),Soltústik Qazaqstan (20 adamnan 29 adamǵa deıin) oblystarynda baıqalady. 8 aı ishinde júrgizilgen tekserýler nátıjesinde, respýblıkanyń kásiporyndarynda anyqtalǵan barlyq buzýshylyqtardyń 30%-y, eńbek qaýipsizdigi jáne ony qorǵaý salasyndaǵy zań­buzý­shylyqtar ekeni baıqal­dy. T.Ospanqulovtyń sózin­she, qaýipsiz eńbek jaǵ­daıyn qam­tamasyz etpeý, jumys­shylar­dyń eńbek qaýipsizdigi boıynsha oqytylmaýy jáne eńbek qaýipsizdigine jaýapty qyzmettiń nemese adamnyń bolmaýy sııaqty jıi kezdesetin zańbuzýshylyqtar jumys berýshilerdiń de, zardap shekken jumysshylardyń ózderi de qaýipsiz eńbek jaǵdaıyn jasaýǵa salǵyrt qaraıtynyn kór­setedi.

Eńbek, áleýmettik qorǵaý jáne kóshi-qon komıtetiniń tóra­ǵasy E.Nurǵalıev jıyndy qo­ry­tyndylaı kele, jaǵdaıdy jaq­sartý úshin oblystyń kásip­oryn­darynda eńbekti qorǵaýdy basqarý júıesin belsendi engi­zý, qaýipsiz eńbek jaǵdaıyn qam­­ta­masyz etý úshin tapsyrys berý­shiden merdigerge deıin tike baqy­laýdy kúsheıtý qajettigi atap ótti. Sonymen birge ol eń­bek qaýip­sizdigi jáne ony qor­ǵaý jónin­degi óndiristik keńester qurý jáne «Halyqtyq baqylaý» jo­ba­syn iske asyrý kerektigin nusqady.

E.Nurǵalıev jumys berý­shilerge Qaraǵandy oblysy bo­ıynsha eńbek ınspeksııa­sy basqarmasymen birlesip, 2019-2023 jyldarǵa arnalǵan óndiris­tik jaraqattar men zııandy eńbek jaǵdaıy bar jumys oryndaryn qys­qartý boıynsha Jol kartasyn iske asyrý jumystaryn kúsheı­týdi, óndiriste jazataıym oqıǵalar bolǵan árbir kásiporynda eńbek jaǵdaıyn jaq­sartý jáne óndiristik jara­qattaný derekterin azaıtý jónin­degi is-sharalar josparyn ázir­lep, bekitýdi jáne de barlyq óndi­ristik kásiporyndarda kási­bı táýekeldi baǵalaý jáne ony tómendetý sharalaryn qabyl­daýdy tapsyrdy.

«Jumys berýshiler men ju­mys­shylar jol beretin zań­bu­zýshylyqtardy azaıtýǵa ba­ǵyt­tal­ǵan mańyzdy qadam – qyz­met­kerlerdi eńbek qaýipsizdigi jáne ony qorǵaý máselelerine, eń­bektiń qaýipsiz ádisteri men tásilderine úıretý boıynsha is-qımyldy kúsheıtý bolyp tabylady», dep atap ótti spıker.

E.Nurǵalıev budan bólek Ha­lyqaralyq áleýmet­tik qamsyz­dandyrý qaýymdasty­ǵynyń «VizionZero» baǵdarlamasyna (nóldik jaraqattaný) kásiporyn­dardy qosý boıynsha aqparattyq naýqandy jalǵastyrýdyń mańyz­dylyǵyn atap ótti.

Keńes qatysýshylary basshy­lyq jáne jumysshylar tarapymen óndiristik jaraqattaný máseleleri boıynsha «Arselor­Mıttal Temirtaý» AQ, «Kaz­sentr­­elektroprovod» JShS­ jáne «Maker» (Maker) KLMZ» JShS sııaqty ónerkásip nysan­daryn aralap, jazataıym oqıǵalardy talqyǵa saldy.

Jumys oryndaryndaǵy oqys oqıǵalar egjeı-tegjeıli talqy­lanyp, tıisti ahýal sarapqa salynatyn osy ispetti májilisterdi óndiristik jaraqat joǵary bolyp turǵan taǵy úsh aımaqta – Qos­tanaı jáne Túrkistan oblys­ta­ryn­da ótkizý josparlanyp otyr.

Qaraǵandy oblysy