Ekinshi ret ótkizilip otyrǵan is-sharaǵa qaladaǵy týrızm salasyna qyzmet etip júrgen 16 dámhana qatysty. Olar óz mázirindegi taǵamdaryn qala ákiminiń orynbasary Tájibek Qalmanuly bastaǵan komıssııa músheleri men qonaqtarǵa usyndy. Dámdi taǵamdardyń sapasy men qunarlyǵy, bezendirilýi syndy talaptar saralanyp, nátıjesinde, "Dıadora" kafesi bas júldege, "Edem", "Shańyraq", "Ýaq", "Indıra", "Mansarda" syndy dámhanalar júldeli oryndarǵa ıe boldy. Sáıkesinshe olarǵa syı-sııapattar berildi. Sonymen qatar, Túrkistan qalasynyń týrızm áleýetin damytyp júrgen týroperatorlar men týragenttikter de marapattaldy. Atalǵan sharany, jyl saıyn mereke qarsańynda ótkizý josparlanǵan.
Taǵamdar festıvali kesene aýmaǵynda boı kótergen etnoaýylda jalǵasyp, kelýshiler ornatylǵan kıiz úıler men konserttik sharany tamashalady. Tájibek Qalmanuly elimizdiń Almaty, Atyraý, Aqtaý, Taraz syndy qalalarynan kelgen týroperatorlar men týragenttik ókilderine týrıster kelgen jaǵdaıda, kútip alýǵa daıyn ekenin jetkizdi. Sonymen qatar, "Amazing Turkistan" týrısterge arnalǵan júıesi týraly keńinen aqparat berilip, qoldaý kórsetiletini aıtyldy.
Túrkistan oblysy
