– Bastapqyda bul ujym mýzykalyq top retinde qurylmaǵan eken. Bir top jigit jaı ǵana jınalyp, aspaptarda oınap, mýzykamen áýestenetin dostar bolǵan. Olar kásibı mýzykant bolamyz dep oılamasa kerek, bárin taǵdyr aıdap, bir arnaǵa toǵystyrypty. Sonymen birge bul fılmde dostyqtyń qalaı týyndaǵany, keıinnen, ókinishke qaraı, qımas dostardyń jigi qalaı ajyrap qalǵany týraly áńgimelenedi. Úlken shyǵarmashylyq ujymdarda kelispeýshilikter bolyp turatyny eshkimge qupııa emes. Biz keıipkerlerimizdiń dostyǵyna ne arqaý bolǵanyn, top ishindegi kelispeýshilikter neden týyndaǵanyn jáne olardyń búgin ne oılaıtynyn kórsetkimiz keledi. Jalpy alǵanda, biz jas stýdentterdiń jaı ǵana shyǵarmashylyq áýestiginiń kele-kele aty ańyzǵa aınalǵan úlken shyǵarmashylyq topqa aınalýy tarıhyn baıandaǵymyz kelip otyr, – deıdi bolashaq kórkem fılmniń qoıýshylary.
Ádette kózi tiri mundaı tulǵalar ómiri derekti fılm janrynda túsirilip jatatyny belgili. Sondyqtan bul shynaıy ómirbaıandyq fılm bola ma, álde rejısser az-kem qııaldap, ómirde bolǵan oqıǵalardy qubylta ma deıtinge kelsek, dál qazirge shyǵarmashylyq toptyń túpkilikti ustanymy joq. Biraq kartınanyń boıamasyz bolatyndyǵyna senedi.
– Prodıýserimizben birge osy top jaıly buryn jazylǵan kitaptardy negizge aldyq. Olardyń biriniń avtory – ansambldiń alǵashqy kórkemdik jetekshisi Dosym Súleevtiń jan jary. Aıta keter jaıt, «Dos-Muqasan» tobynyń alǵashqy shlıagerleriniń avtory Dosymnyń ózi bizdiń keńesshimiz bolyp, óte qatty ásirelep, bolmaǵandy bolǵan dep qoımaýymyzdy qadaǵalap otyrdy. Bizdiń ekinshi keńesshimiz, mańyzdylyǵy odan kem túspeıtin adam – Murat Qusaıynov – toptyń qazirgi kórkemdik jetekshisi, onymen de kezdesip, áńgimelestik. Súleev te, Qusaıynov ta bizge ujymnyń tarıhyn aıtyp berdi jáne olardyń baıandaǵan áńgimeleri bir-birinen asa alshaq bolmady. Sondaı-aq «Dos-Muqasan» kompozısııalarynyń avtorlaryn da sózge tarttyq, olar ánderdiń shyǵý tarıhyn áńgimelep berdi. О́ıtkeni halyq arasynda bul taqyrypta oıdan shyǵarylǵan túrli áńgimeler az emes, – deıdi kartına rejısseri.
Aıdyn Sahamannyń aıtýynsha, ókinishke qaraı, muraǵatta «Dos-Muqasan» konsertteriniń beınejazbalary óte az. Kóptegen beınebaıan, derekti mýzykalyq fılm bar, biraq konsertteri joq bolyp shyqqan.
Túsirý toby dál osy kúnderi fılmdi shyǵarýdyń qaı kezeńinde turǵanyna kelsek, bul jaı ǵana oıyn fılmi emes, mýzykalyq fılm bolǵandyqtan, ssenarıı áli de pysyqtalýda. Munda mýzykalyq erekshelik barshylyq, atap aıtsaq, aýysatyn jerleri de kóp, qaı kompozısııa qaı jerde turýy tıis, ol dramatýrgııa turǵysynan jaqsy quryldy ma degen sııaqty máselelerge kóńil bólinip otyr.
– Biz qazir kóp nársege taldaý jasap, durys sheshim tabýǵa tyrysyp jatyrmyz. О́ndiris jaǵyna keler bolsaq, karantın shekteýinen keıin birinshi ret bas qosqanda biz prodıýsermen birge О́skemen, Qaraǵandy, Temirtaý qalalaryna túsirilim jasaý oryndaryn izdeýge bardyq. Bizdiń fılmniń oqıǵasy 60-70-jyldary oryn alǵan, al Almatyda jańa ǵımarattar óte kóp bolǵandyqtan, biz sol jyldardaǵydaı kórinisterdi ózge óńirlerden izdep júrmiz, – deıdi rejısser.
Al endi ańyz bolǵan áýesqoı mýzykanttardyń rólderin kimder somdaıdy? Qazirgi shyǵarmashylyq top muny egjeı-tegjeıli aıta almasa da, biraq ashyq kastıng jasaýdy josparlap otyr.
– Biz keıipkerlermen, olardyń jas erekshelikterimen portrettik uqsastyq tabýǵa tıispiz, birneshe ýaqyt kezeńin qamtyp kórsetýimiz kerek. Eń bastysy, bizdiń akterlerimiz mýzykant bolýy qajet, olar aspaptarda oınaı bilýi kerek. Toptyń ár múshesiniń boıyndaǵy darynyn tolyq kórsetýge talpynyp otyrmyz, ol úshin, árıne, fılmde oınaıtyn akterler aspapta oınaı bilýi kerek. Eger akter portrettik turǵydan sáıkes keletin bolsa, biz oǵan belgili bir aspapta oınaýdy arnaıy úıretetin bolamyz, – dedi kınojoba rejısseri Aıdyn Sahaman.
ALMATY
