Eki jyl ýaqyt ishinde áskerı joǵary oqý ornynyń túleginen, rota komandırine deıingi eńbek jolynan ótken 12 úzdik jas ofıser "Úzdik maman" erekshe japsyrmalarymen marapattaldy.
Qurlyq áskerlerinde jas ofıserlerdiń jetken jetistikteriniń negizgi kórsetkishi, ol rota (batareıa) komandırine deıingi qyzmettik ósýi bolyp tabylady.
Eki jyl ofıserlik mansaptyń ishinde barlyq 12 ofıser-túlek tek sabaqtar men bólimsheniń mindetterin pysyqtaý barysynda ǵana erekshelenip qoımaı, áskerı bólimsheleriniń qoǵamdyq ómirine de belsene aralasyp, ózderin jaqsy qyrynan kórsete bilgen. Únemi alǵa umtylýǵa tyrysatyn belsendi ómirlik ustanymdarymen olar, shyn máninde ujymnyń úzdigi bolyp, kóshbasshylyq qoldaýǵa ıe boldy.
Qurlyq áskerleriniń bas qolbasshysy olarǵa bıik belesterdi baǵyndyryp, Otan ıgiligi úshin laıyqty qyzmet etýdi tiledi.
Jas ofıserlerdiń jetistikterge qol jetkizýi, bolashaq leıtenanttar úshin jaqsy motıvasııa bolyp tabylady. Ol úshin is-sharaǵa 3-4 kýrs kýrsanttary shaqyryldy. Olar ózderiniń aǵa joldastarynyń áskerlerdegi qyzmeti týraly áńgimelerin tyńdady.
Aıta ketý kerek, jas ofıserler arasynda kadrlyq saıasatty jetildirý jobasy Qazaqstannyń Qurlyq áskerlerinde 2010 jyldan bastap júrgizilip keledi. Onyń negizgi ıdeıasy – Qurlyq áskerleri Áskerı ınstıtýtynyń túlekterin zertteý jáne olardy úsh topqa shartty túrde bólý bolyp tabylady.
Birinshi topqa kásibı bilimi, kóshbasshylyq qasıetteri jáne moraldyq, neıropsıhıkalyq turaqtylyqtyń joǵary deńgeıi bar túlekter jatady. Taldaý kórsetkendeı, birinshi kategorııada joǵary kóshbasshylyq, erik-jigerli, zııatkerlik jáne basqa da qasıetteri bar kýrsanttar qyzmet barysynda aıtarlyqtaı jetistikterge jetedi.
Ekinshi topqa barlyq qajetti qasıetteri bar, biraq tájirıbelik daǵdylaryn jetildirýge mindetti túlekter jatady.
Úshinshi topqa shtabtyq laýazymdarǵa jáne qyzmet bastyqtary retinde taǵaıyndaýǵa qolaıly túlekter biriktirilgen.
2018 jyly 144 kýrsant-túlek atalǵan úsh sanatqa bólindi, olardyń qyzmeti men jetistikterin taldaý jalǵasýda.
Áskerı ortadaǵy ujymdyq jáne jeke kóshbasshylyq júıe qazirgi zamanǵy áskerı ujymdy basqarýdaǵy mańyzdy aspektke aınalýda. Búgingi tańda áskerı isterde tereń ózgerister bolǵan kezde, jaýyngerlik is-qımyldar áskerlerdiń joǵary qarqyndylyǵymen, utqyrlyǵymen jáne manevrligimen, jaýyngerlik jaǵdaıdyń jyldamdyǵymen, kúrt ózgerýimen sıpattalýda. Sol sebepti áskerı qyzmetshilerge de erekshe talaptar qoıylady.
Kóshbasshylar árqashan aldyńǵy qatarda bolýǵa tyrysyp, qol astyndaǵylardy alǵa qoıǵan maqsattaryna sátti jetýge qoldaý bildiredi.
