Jaqynda áleýmettik jelini sharlap ketken jaýyz ákeniń balasyn aıaýsyz uryp-soqqan vıdeosy kópshilikti shoshytty. Bul – kóz kórip, jurtqa jarııa bolǵan, bultartpas aıǵaq retinde taralǵan jaǵdaı. Al kópshilik bile bermeıtin, otbasynyń oıranyn shyǵaryp, qutyn qashyryp otyrǵan zorlyq-zombylyqtar qanshama?!.
Atalǵan oqıǵa Túrkistan oblysy Qazyǵurt aýdanyna qarasty Qyzylqııa aýylynda bolǵan. Áleýmettik jelide taraǵan vıdeoda otaǵasy balasyn aıaýsyz uryp jatqany túsirilgen. Taǵy bir vıdeoda ekinshi balasy da opasyz ákesinen ońbaı taıaq jepti.
Qazir kúıeýinen kóresini kórgen áıeli balalaryn alyp qashyp, tórkininen pana taýypty. Áıel buǵan deıin polısııaǵa jubaıynyń mundaı áreketin aıtyp aýyzsha aryzdanǵan, biraq ótinish berýden bas tartqan eken. Endi polıseıler 4 qazan kúni áleýmettik jelilerge monıtorıng júrgizý barysynda atalǵan oqıǵany anyqtap, is sotqa deıingi tergeý tizilimine Qylmystyq kodekstiń
110-baby – azaptaý boıynsha tirkeldi.
Jurttyń jappaı narazylyǵyn týdyrǵan mundaı oqıǵalar turmystyq zorlyq-zombylyqqa qarsy is-sharalardy kúsheıtip, otbasynyń berekesin qashyrǵan ospadarlardyń jazasyn barynsha qataıtý kerek ekenin kórsetedi. Bul másele Memleket basshysynyń da nazarynan tys qalmaı, Prezıdent tapsyrmasymen Parlamentte otbasyndaǵy zorlyq-zombylyqqa qarsy jazany kúsheıtý jóninde zań jobasy qaralyp jatyr.
Osyndaı oqıǵaǵa qynjylys bildirgende kópshilik kóbine quqyq qorǵaý organdarynyń áreketsizdigin synǵa alady. Aıtalyq bıylǵy 8 aıdaǵy jaǵdaı boıynsha turmystyq zorlyq-zombylyqqa baılanysty 130 myń shaǵym túsken eken. Onyń tek 2,5 myńyna qatysty qylmystyq is qozǵalyp, 30 myń is ákimshilik qaraýǵa jiberilgen. Iаǵnı, polısııa barlyq shaǵymǵa tıisti shara qoldana almaǵan.
Al indet qos ókpeden qysqan kúrdeli kezeńde úıinde qalyp, úreı qushaǵyna engen, otaǵasynan jábir kórgen jaǵdaılar kúrt kóbeıdi. Qoǵamnyń birligi synalar shyrǵalań shaqta shańyraǵynyń shyrqyn buzar qatygez ákeden keletin qaýiptiń aldyn alý mańyzdy bolyp tur.
(Taqyryptyń jalǵasyn 15-betten oqısyzdar)
